Бугун Францияда 500 дан ошиқ ўзбек истиқомат қилмоқда. Улар турли соҳаларда ўқийди ва фаолият олиб боради. Ўзбекистонлик талабалар Францияда асосан иқтисодиёт, ҳуқуқ, меъморчилик, қишлоқ хўжалиги соҳалари бўйича таълим олади. Ўзининг юксак салоҳияти ва истеъдоди эвазига шу ерда ишлаб, тажриба тўплаётган ўзбекистонликлар ҳам кўп, деб ёзади ЎзА.
Жорий йил бошида Парижда истиқомат қилаётган ўзбекистонликлар «Мерос» ассоциациясини тузди. Улар ўзбек миллий қадрият ва анъаналарини ўзида акс эттирган турли маданий-маърифий тадбирлар ўтказиб келади.
Шунингдек, ассоциация Ўзбекистондан бориб Францияда фаолият юритаётган, ўқиётган ёшларни бирлаштириб, ўзбек маданияти, анъаналарини тарғиб қилиш билан шуғулланади. Тадбирларга францияликлар ҳам жалб қилиб турилади. Уларга Ўзбекистондаги турли соҳаларда яратилган шароитлар, ўзбек ошхонаси ҳақида маълумотлар бериб борилади.
«Тадбирлар асосан миллий маданиятимизнинг тарғиботига бағишланади, — дейди ассоциация раиси Фаррухбек Йўлдошев. — Яқинда бўлиб ўтган тадбиримиз Алишер Навоий ва Заҳириддин Муҳаммад Бобур ижодига бағишланди. Тадбирда нафақат юртдошларимиз, балки, францияликлар ҳам фаол иштирок этди. Бу каби тадбирларни ўтказишда Ўзбекистоннинг Франциядаги элчихонаси билан фаол ҳамкорликни йўлга қўйганмиз».
Андижонлик Фаррухбек Йўлдошев Андижон Муҳандислик ва иқтисодиёт институтини тугатган. Париждаги Ecol Central de Paris муҳандислар мактабини тамомлаган. Ўқишни тугатиб автомобиль индустрияси бўйича фаолият бошлаган. Айни кунда автомобиль ишлаб чиқариш соҳасида фаолият олиб бормоқда.
Изоҳ (0)