Жиззах вилояти Фавқулодда вазиятлар бошармаси Жиззах шаҳрида жойлашган истироҳат боғидаги аттракциондан тушиб кетган йигит юзасидан маълумот берди.
Қайд этилишича, мазкур ҳолат юзасидан Жиззах вилояти ФВБ ва профилактика инспекторлари томонидан ўрганишлар олиб борилган. Натижада ушбу воқеа 1 июнь куни соат 20:00 ларда содир бўлгани аниқланган. Пахтакор туманида яшовчи 17 ёшли М.Ў оила аъзолари билан биргаликда Жиззах шаҳрида жойлашган “Ўрда экологик истироҳат боғи”га айланиш учун бориб, атраксионда учиш вақтида операторларнинг огоҳлантиришларига қарамасдан, ўзининг эҳтиётсизлиги оқибатида, яъни аттракцион тўлиқ тўхтамасдан олдин ҳимоя камарини ечиб юборган.
Натижада у йиқилиб тушган, бироқ ҳеч қандай тан жароҳати олмагани ва мазкур ҳолат содир бўлган вақтда аттракционда носозликлар бўлмагани маълум бўлган.
Аввалроқ Telegramъда “Ўзбекистондаги энг даҳшатли аттракцион” деб номланган видео тарқалганди. Мазкур видеолавҳада акс этган чархпалак аттракциони қўмитанинг масъул ходимлари томонидан дастлабки ўрганишларга кўра, Андижон шаҳри Бобур номли истироҳат боғида жойлашгани аниқланган эди.
“Дарё”нинг 2023 йил мавсуми бошидаги ўрганишларига кўра, Ўзбекистондаги мавжуд 143 та истироҳат боғида жойлашган 1845 та аттракционнинг атиги 5-6 фоизи техник кўрикдан ўтказилган бўлиб, фойдаланиш учун хавфсиз деган хулоса берилган. Қолган аттракционларнинг техник ҳолати номаълум. Жорий мавсумда бу ҳолат қандай экани ҳозирча номаълум.
Изоҳ (0)