Қонунчилик палатасининг 26 ноябрь, сешанба куни бўлиб ўтган мажлисида қонун лойиҳалари билан бирга, қуйи палата томонидан юборилган бир қатор парламент сўровларига вазирликлардан келган жавоблар ҳам атрофлича кўриб чиқилди.
Палата матбуот хизмати хабарида қайд этилишича, Маданият вазири Бахтиёр Сайфуллаевга юборилган «Республикамиздаги мавжуд моддий маданий мерос объектларини тиклаш, сақлаш ҳамда муҳофаза қилиш мақсадлари учун Ўзбекистон Республикаси Давлат бюджетидан ва давлат мақсадли жамғармалари бюджетларидан ажратилаётган маблағлардан самарали фойдаланиш борасида олиб борилаётган ишлар тўғрисида»ги парламент сўрови юзасидан тақдим этилган жавоб ҳар томонлама муҳокама этилган.
2018 йилда моддий маданий мерос объектларини таъмирлаш-тиклаш ишларини олиб бориш учун республика бюджети ҳисобидан 47,5 миллиард сўм ажратилган ва мақсадли сарфланган.
Андижон вилоятидаги Жоме меъморий мажмуаси, Арк ичи мадрасаси (Заҳириддин Муҳаммад Бобур уй-музейи), Ховускон ота зиёратгоҳи, Бухоро вилоятидаги Чор Бакр мажмуаси, Абдухолиқ Ғиждувоний мақбараси, Қашқадарё вилоятидаги Баҳовуддин Нақшбандий, Имом Муйин ан-Насафий, Ҳусан ота мажмуалари, Маҳмуд ибн Аминбой уйи, Шаҳрисабз қалъа девори ҳамда Қорақалпоғистон Республикасидаги Довуд ота мажмуаси, Фил қалъа девори, Қизил қалъа қўрғони, Ҳаким ота (Сулаймон Бақирғоний) мақбараси, Бурахон ота мақбараси, Катта Гулдурсун археологик объектларида таъмирлаш-тиклаш ишлари амалга оширилган.
Шунингдек, Самарқанд вилоятидаги Бибихоним масжиди, Ҳазрати Хизр, Хўжа Аҳрор Валий мажмуалари, Хўжа Зудмуруд масжиди, Бухоро яхудийлари қабристони (Афросиёб қалъа девори), Хўжа Сафой Валий жоме масжиди, Нодир Девонбеги, Усматбой, Шердор мадрасалари, Сурхондарё вилоятидаги Саид оталиқ, Султон Саодат мажмуалари, Жарқўрғон минораси, Қирқ қиз қалъаси, Қоратепа, Кампиртепа қалъаси каби археологик ёдгорликларида ҳам бунёдкорлик ишлари олиб борилган.
2019 йил 4 июнь куни Маданият вазирлиги ҳамда Фуқароларнинг ўзини-ўзи бошқариш органлари фаолиятини мувофиқлаштириш бўйича Республика кенгаши билан «Моддий маданий мерос объектларига жамоатчи инспекторларнинг фаолиятини ташкил этиш тартиби тўғрисида»ги қўшма қарори имзоланди.
Мазкур қўшма қарор билан моддий маданий мерос объектларини асраш, сақлаш ва уни келажак авлодга етказиш мақсадида маҳаллий фаоллардан жамоатчи инспекторларни бириктириш ишлари олиб борилмоқда. Бугунги кунда 2563 нафар жамоатчи инспектор бириктирилган бўлиб, улар билан моддий маданий мерос объектларига «муҳофаза» шартномалари имзоланиб, инспекторларга гувоҳномалар берилган.
Изоҳ (0)