Самарқанд шаҳрида катта босимдаги марказий сув қувурида 27 май куни носозлик юзага келди. Бу ҳақда шаҳар ҳокимлиги матбуот хизмати хабар берди.
Қайд этилишича, Чўпон ота сув иншоотидан келаётган диаметри 1000 миллиметрлик катта босимдаги марказий сув қувурида фавқулодда носозлик юзага келган. Айни пайтда таъмирлаш ишлари олиб борилмоқда.
Шу сабабли Зарафшон шох, Андижон, Уста Умар Жўрақулов, Панжикент, Сўзангарон, Навоий шоҳ, Садриддин Айний, Амир Шоҳмурод, Регистон, Термиз, Университет хиёбони, Орзу Маҳмудов, Ўзбекистон, Фирдавсий, Абдураҳмон Жомий, Амир Темур, Мирзо Улуғбек, Акбар Отахўжаев, Бобур Мирзо кўчалари ҳамда ушбу кўчаларга туташ маҳалла ва ҳудудларда вақтинча ичимлик суви тўхтатилган.
“Самарқанд сув таъминоти”нинг маълум қилишича, ушбу сув қувури ўтган асрнинг 80 йилларида қурилган бўлиб, бугунги кунда шаҳар аҳолисининг катта қисмига сув етказиб беради.
28 май соат 07:55 ҳолатига кўра, носозликни бартараф этиш ишлари давом этмоқда. Шаҳарнинг тармоқдан узилган ҳудудларига график асосида махсус техникалар орқали аҳолига ичимлик суви етказиб берилмоқда.
Изоҳ (0)