Берлин яқинидаги Tesla заводининг кенгайтирилишига қарши чиққан иқлим фаоллари дарахтларга чиқиб олиб, пастга тушишдан бош тортмоқда. Бу ҳақда Spiegel журнали маҳаллий полицияга таяниб хабар берди.
Ҳуқуқ-тартибот идоралари ходимлари экофаолларни дарахтдан олиб тушиш ҳаракатларини бошлашга тайёрланмоқда.
“Tesla заводининг кенгайишига қарши бўлган намойишчиларни дарахтлардан олиб тушиш бўйича полиция операцияси бугун давом этади. Баъзи фаоллар лагер ҳудудини тарк этишдан бош тортган ҳолда ҳамон шохлар ёки дарахтлар устида ўтиришибди”, дейилади мақолада.
Дастлаб, фаоллар лагернинг бир қисмини вақтинча бўшатишлари керак эди. Бу вақт оралиғида ҳудуддаги ерларда портловчи эски снарядлар мавжудлигини текшириш режалаштирилганди. Бироқ Грюнҳайд расмийлари “жамоат хавфсизлигига риоя қилинмагани ва тартибнинг бузилгани” туфайли ўрмонга киришни бутунлай тақиқлади.
Атроф-муҳит фаоллари Tesla компаниясининг кенгайиши учун 100 гектардан ортиқ ўрмоннинг кесилишига қарши чиқмоқда. Февраль ойида улар Берлин яқинида лагер қуриб олиб, намойиш ўтказишга киришди.
Бир кун олдин полиция лагерни тозалашни бошлади. Фаолларнинг аксарияти ҳуқуқ-тартибот ходимлари пайдо бўлганидан кейин ўз ихтиёри билан кетишган, бироқ баъзилари яширинган жойларини тарк этишдан бош тортган.
Аввалроқ АҚШда ўлим билан тугаган ЙТҲ сабаб 2,5 млнга яқин Tesla автомобили қайта текширилиши маълум қилинганди.
Изоҳ (0)