Tesla раҳбари Илон Маск Германияда компаниянинг янги заводини расман очди. Электромобиль ишлаб чиқариш корхонаси учун 5 миллиард евродан ортиқ маблағ сарфланган, деб хабар беради «Интерфакс».
Очилиш маросимида Маск янги завод ҳам электромобиль, ҳам аккумуляторлар ишлаб чиқариш учун асос бўлишини маълум қилган. Берлин яқинидаги Грюнхайде шаҳрида жойлашган «Гигафабрика» ҳозирги кунга қадар АҚШ ва Хитойдан автомобиль етказиб берилган Европа бозори учун электромобилларни ишлаб чиқаради.
Завод йилига 500 минг донагача электромобиль ишлаб чиқаради ва 12 минг иш ўрни яратади. Биринчи босқичда бу ерда ихчам Model Y кроссоверлари ишлаб чиқарилади. 22 март куни ўтказилган маросимда Маск янги заводдан чиққан 30 машинани ўз мижозларига топширган.
«Биз ишлаб чиқараётган ҳар бир электр транспорт воситаси барқарор энергия келажаги сари навбатдаги қадам бўлади», — дейди Маск очилиш маросимида.
Германия канцлери Олаф Шольц Tesla заводининг қурилишини маъқуллаб, бу минтақа иқтисодиётини қўллаб-қувватлашини билдирган. Бироқ экспертларнинг таъкидлашича, Украина атрофида юзага келган вазият эҳтиёт қисмлар етишмовчилиги муаммосини кучайтириб, Tesla’нинг янги корхонаси имкониятларига салбий таъсир кўрсатади.
«Tesla ўзини таъминотдаги узилишлар муаммосидан бутунлай ҳимоялай қила олмайди», — дейди Center оf Automotive Management директори Штефан Брацел.
Германиянинг Center Automotive Research (CAR) экспертларининг тахминича, 2022 йилда Германиядаги Tesla корхонаси камида 100 минг автомобиль ишлаб чиқаради, 2023 йилда ишлаб чиқариш кескин ўсади.
22 март куни савдоларда Tesla акциялари 3,4 фоизга қимматлашган. Сўнгги бир йил ичида уларнинг қиймати 44 фоизга ўсди.
Эслатиб ўтамиз, 2021 йилнинг октябрида Tesla компанияси Европадаги биринчи «Гигафабрика»си — Грюнхайдда жойлашган заводнинг очилишини тантанали тарзда нишонлаганди. Тадбирда 9 минг киши иштирок этган бўлиб, дижейлар таклиф этилган ва болалар ҳамда катталар учун турли тадбирлар уюштирилган. Компания раҳбари Илон Маск немис тилида табрик нутқини сўзлаган ва келажакда корхона ҳудудида вокзал ҳамда пиво заводи қурилишига ваъда берган.
Европадаги «Гигафабрика»ни қуриш ишлари 2019 йилда бошланган ва қатор муаммоларга дуч келган. Қурилиш майдонида ишлар турли сабабларга кўра бир неча бор тўхтаб қолган — масалан, ҳудудда топилган Иккинчи жаҳон урушига оид жанговар ўқ-дорилар, кейинроқ — калтакесак ва илонлар популяциясига зарар етказилиши хавфи сабаб. 2021 йилнинг майида радикал фаоллар корхонадаги юқори волтли кабелларни ёқиб юборган.
Изоҳ (0)