Tesla Берлин яқинидаги заводда автомобиль ишлаб чиқаришни тўхтатмоқчи. Бунга Қизил денгиздаги кемаларга ҳужумлар муносабати билан логистикадаги узилишлардан сўнг юзага келган бутловчи қисмлар тақчиллиги сабаб бўлмоқда.
“РИА Новости” ёзишича, Гигафабрика деб аталадиган заводда ишлаб чиқариш 29 январдан 11 февралгача деярли тўлиқ тўхтатилади.
“Қизил денгиздаги қуролли тўқнашувлар ва у билан боғлиқ ҳолда Умид бурни орқали Европа ва Осиё ўртасидаги транспорт йўналишларининг ўзгариши Грюнҳайдедаги ишлаб чиқаришга ҳам таъсир қилмоқда. Ташиш вақтларининг сезиларли даражада узоқлашиши таъминот занжирларида бўшлиқни юзага келтирмоқда”, — дейилади Tesla баёнотида.
2023 йил 31 декабрда АҚШ ҳарбий-денгиз кучлари Қизил денгизда савдо кемасига ҳужум қилган учта ҳусий қайиғини чўктиргани ҳақида хабар берилганди. 2024 йил 12 январда АҚШ ва Буюк Британия Ямандаги ҳусий объектларига қатор зарбалар берди.
Изоҳ (0)