2017 йилда инвестиция киритиш учун энг қулай шаҳарлар еттилиги

Knight Frank консалтинг компаниясининг «Бойлик тўғрисидаги ҳисоботи»да 2017 йилда қайси шаҳарларга шахсий инвестициялар киритиш маъқуллиги борасида фикрлар билдирилди. Асосий критерийлар сифатида таълим тизими, турмуш тарзи, инфраструктура, технологиялар ва кўчмас мулк кўриб чиқилди. Ушбу рейтинг Forbes саҳифаларида келтирилди.

Амстердам, Нидерландия

2015 йилда Амстердам CITIE тадқиқотида жаҳоннинг беш энг инновацион шаҳри рўйхатига киритилган эди. Маҳаллий хайтекнинг асосий иштирокчилари орасида Uber, Netflix ва Tesla’нинг Европадаги штаб-квартиралари бор. Шунингдек, Нидерландиянинг капитализацияси 1 миллиард доллардан ошадиган илк компанияси, Facebook, Spotify, AirBnB, Uber ва Tesla мижозларига хизмат кўрсатувчи Ayden тўлов стартапи ҳам шу ерда жойлашган. Бундан ташқари, Амстердам анъанавий тарзда яшаш учун қулай шаҳар ҳисобланиб, ривожланган инфраструктурага эгадир.

Майами, АҚШ

Флорида штатининг энг машҳур шаҳри қуёшли пляжлари, туристлар оқими ва бойларнинг шинам қароргоҳлари билан машҳур. Айни пайтда бу ерда технологик аспект жадал суръатлар билан ривожлантирилмоқда. 2014 йилда бу ерга Microsoft’нинг инновацион маркази кўчиб ўтди. Art Basel Maiami’нинг очилиши билан шаҳарда кўплаб янги кварталлар, ресторанлар ва галереялар пайдо бўлди. Майами университетининг бизнес мактаби ва юридик факультети рейтингларда борган сайин юқориламоқда.

Бангалор, Ҳиндистон

Ҳиндистоннинг хайтек ва стартаплар пойтахтига секин-аста трансмиллий корпорациялар — Uber, Airbus, Visa ва бошқалар ўрнашмоқда. Бангалорда қароргоҳи жойлашган маҳаллий гигантлар сирасига Flipkart, InMobil ва MuSigma киради. Бундан ташқари, шаҳарда кўплаб йирик тадқиқот марказлари, жумладан, Ҳиндистон илмий институти жойлашган.

Берлин, Германия

Берлинда ҳар йили 40 мингдан ортиқ стартап очилади, яшаш нархи эса Германиядаги энг паст кўрсаткичлардан бирини ташкил этади. 2014 йилда бу ерга 174 минг киши кўчиб ўтди, уларнинг ярмидан кўпроғи чет элликлардир. Хизмат кўрсатиш ва туризм соҳасининг ривожи туфайли шаҳар иқтисодиёти Германиядаги энг яхши натижалардан бирини қайд этмоқда.

Мехико, Мексика

Автомобиль саноати, телекоммуникациялар, логистика ва ритейл ривожи туфайли Мексика пойтахти катта миқдорда инвестициялар жалб қилишда давом этмоқда. 2000 йилдан буён офислар бозори 200 фоизга ошди — Мехикода 170 та янги бино пайдо бўлди. Айни пайтда аэропорт реконструкциясига маблағ йўналтирилмоқда, 2020 йиллар бошида унинг ўтказиш имконияти йилига 50 миллион йўловчи ва 550 минг рейсни ташкил этиши кутилмоқда.

Остин, АҚШ

Техас штати пойхатини баъзан Кремний тепаликлари деб аташади. Охирги йилларда Остинда давлат маблағлари улуши катта иқтисодиётдан технологик етакчига айланди. Бу ерда Apple, Cisco Systems, Dell, HP, Facebok ва Google ўрнашди. Шаҳар аҳолиси кунига 150 кишига кўпаймоқда. Техас университети ва бошқа олийгоҳлар шаҳарга билимли ва савияли ёшларни жалб қилмоқда.

Мельбурн, Австралия

2036 йилга келиб Мельбурн аҳоли сони бўйича Австралиянинг энг йирик шаҳри — Сиднейдан ўзиб кетиши кутилмоқда. Economist Intelligence Unit рейтингида Мельбурн яшаш учун қулай шаҳарлар орасида биринчи ўринни эгаллаб турибди. Офис бозори аллақачон Сиднейдагидан ўтиб кетган, шаҳарнинг марказий қисмида ишловчилар сони охирги 10 йилда 24 фоизга ўсди.