O‘zbekistonda gidroelektr stansiyalari tomonidan qancha elektr energiya ishlab chiqarilgani ma’lum qilindi.
Statistika agentligi ma’lumotlariga ko‘ra, 2024-yilning 9 oyida yirik gidroelektr stansiyalari tomonidan jami 6 410,9 million kVts elektr energiyasi ishlab chiqarilgan.
Taqqoslash uchun, 2023-yilda bu ko‘rsatkich 5 465,5 million kVts ni tashkil qilgan.
Avvalroq IRENA agentligi “2023-yilda qayta tiklanadigan energiya manbalaridan elektr energiyasi ishlab chiqarish qiymati” yillik hisobotini e’lon qilgandi.
Unga ko‘ra, butun dunyoda quyosh generatsiyasi va gidroenergetika o‘rtasidagi elektr energiyasi ishlab chiqarish tannarxi farqi ortib bormoqda.
2022-yilda yangi GESlar energiyasi quyosh elektr stansiyalari energiyasidan 20 foiz qimmatroq bo‘lgan, 2023-yilga kelib bu farq 30 foizgacha yetdi. Mutaxassislar bu yangi energiya quvvatlarini qurishni rejalashtirishda hal qiluvchi ahamiyatga egaligini aytmoqda.
2023-yilda gidroenergetika quvvatlarini qurish 1 kilovatt o‘rnatilgan quvvat uchun 2800 AQSH dollarini tashkil etdi. Bu quyosh elektr stansiyalariga nisbatan 3,5-4 barobar, quruqlikdagi shamol elektr stansiyalariga nisbatan 2,5 barobar qimmat va dengiz shamol qurilmalarini qurish bilan taxminan bir xil narxda edi.
Bundan tashqari, GES qurilishining o‘rtacha muddati quyosh elektr stansiyalariga nisbatan 7-10 barobar, shamol elektr stansiyalariga nisbatan esa 5 barobar uzoqroq davom etadi.
“Shunday qilib, yaqin yillarda GESning yagona qiyosiy ustunligi faqat kun davomida energiya ishlab chiqarishni moslashuvchan tarzda boshqarish qobiliyati bo‘lib qolishi mumkin”, deyiladi agentlik hisobotida.
Izoh (0)