Бухоро вилоятининг Жондор туманида туғилган 38 ёшли аёл TikTok’да Матлуба номи билан профил очиб, одамларга ўзини бош мия саратони ва жигар циррози билан курашаётган бемор сифатида кўрсатиб, одамларнинг хайрия пулларини “еб келгани” маълум бўлди. Жиноят ишлари бўйича Жондор туман судида аёлнинг хатти-ҳаракатига қонуний баҳо берилди.
Суд ҳужжатларида ёзилишича, аёл ўзгаларнинг мулкини талон-торож қилиш мақсадида 2021 йилнинг бошларида TikTok ижтимоий тармоғида “Матлуба1986” номли профил очиб, ушбу манзил орқали ўзининг бош мия саратони ва жигар циррози касаллигига чалингани ҳақида ёлғон видеомурожаатлар қилган. Даволаниши ва бошқа харажатлари учун тармоқ кузатувчиларидан эҳсон сифатида пул олишини айтиб, пластик карточкалари рақамларини эълон қилган.
У 2023 йилнинг ноябрь ойида Мақсад Наврўзовадан 5 миллион сўм, Шоҳиста Ортиқовадан 1 миллион сўм, Зулфизар Ўктамовадан 1,5 миллион сўм пул олган.
Суд муҳокамасида судланувчи тариқасида сўроқ қилинган аёл айбига тўлиқ иқрорлик билдириб, бундай хатти-ҳаракатига оилавий аҳволининг оғирлигини сабаб қилиб кўрсатган.
2021 йил бошларидан буён оила аъзоларим билан бирга Россия давлатига ишлаш мақсадида бориб келаман. Охирги марта 2022 йилнинг охирларида Россияга кетиб, 2023 йилнинг тахминан ноябрь ойларида қайтиб келиб, ҳозирги кунга қадар уйимдаман.
2021 йилда Россия давлатида ишлаб юрган вақтимда иқтисодий шароитим оғир бўлгани сабабли турли ишларда ишладим. 2019 йил охирларидан ўзимга тегишли телефонда TikTok ижтимоий тармоғидан “Матлуба” номли профил очиб, фойдаланиб келдим. 2021 йилнинг бошларида иқтисодий шароитим оғир бўлгани сабабли пулга муҳтож бўлиб қолдим.
Шундан сўнг TikTok’да ўзимни бош мия саратони ва жигар циррози касаллигига чалинган аёл сифатида кўрсатиб, жонли эфирлар қилдим ва одамлардан эҳсон пули сўрай бошладим. 2024 йилнинг апрель ойига қадар TikTok’дан картамга турли миқдордаги пулларни ташлатиб, уни шахсий харажатларим учун сарфлаб келдим, дейди воқеа ҳақида гапирган судланувчи.
Аёлнинг тан олишича, у умуман касалликка чалинмаган бўлган.
Мен Матлубанининг видеолавҳаларидан унинг иқтисодий шароити оғир эканини билган эдим. Ўша вақтда Матлуба TikTok ижтимоий тармоғида жонли эфир қилган вақтлари ўзининг бош мия саратони касаллигига чалинганини айтиб, жонли эфирда уни кузатувчилардан эҳсон сўрашни бошлаганди.
Менинг онам ҳам саратон касаллигига чалиниб вафот этгани сабабли Матлубага раҳмим келган эди ва унга моддий жиҳатдан ёрдам беришга қарор қилдим. Матлуба TikTok’да қилган жонли эфирларида ўзининг пластик карта рақамларини ёзиб қўяр эди. Мен шундан кейин Матлубанинг пластик картасига турли миқдорда пул ўтказиб беришни бошладим. Бўлиб-бўлиб унга 5 миллион сўм миқдорида пул бердим.
2024 йилнинг апрель ойи бошларида Матлуба TikTok’даги жонли эфирида қорнининг расмини ҳам кўрсатиб, жигар циррози касаллигига чалинганини айтиб, кузатувчилардан эҳсон сўрашни давом эттирди. Кейин билсак, у қорни устига дока қўйиб, “изолента” ёпиштирган экан. Суриштирсам, аслида, у ҳомиладор экани маълум бўлди, дейди судда сўз олган жабрланувчилардан бири.
Суд аёлни Жиноят кодексининг 168-моддаси 3-қисмининг “б” ва “г” бандлари (такроран ёки хавфли рецидивист томонидан ахборот тизимидан, шу жумладан, ахборот технологияларидан фойдаланиб содир этилган фирибгарлик) билан айбли деб топиб, унга нисбатан шу модда билан Жиноят кодексининг 57-моддасини қўллади ва куннинг кеч соат 22:00 дан эрталаб соат 07:00 гача яшаш жойидан чиқиши чекланган ҳолда, 5 йил озодликни чеклаш жазоси тайинлади.
Аввалроқ Бухорода 16 ёшли бола ўзгалар номига кредит олиб, онлайн қиморга тикиб юборгани, Тошкентда фуқарони Японияга ишга жўнатиш эвазига 7,4 минг доллар олган шахс ушлангани хабар берилганди.
Изоҳ (0)