Ўзбекистонда 65 нафар бола ўлимига сабаб бўлган дори сифатида қаралаётган “Док-1 Макс” сиропи бўйича суд давом этмоқда. Суднинг навбатдаги мажлисида сўроқ қилинган айбланувчилардан бири Н.М. исмли аёл тергов жараёнида унга руҳий босим бўлганини айтди. Бу ҳақда суд мажлисида иштирок этган “Дарё” мухбири хабар берди.
Суднинг 18 август куни давом этган мажлисида дастлаб М.Н. исмли аёл сўроқ қилинган.
Суд тергови давомида судланувчи терговдаги кўрсатувларига тўғри келмайдиган, дастлабки кўрсатувларини рад этувчи маълумотлар бергач, раислик этувчи Мусо Юсупов судланувчига “Терговдаги дастлабки кўрсатувларингиз ҳозирги гапларингизга тўғри келмаяпти, бир-бирини инкор этмоқда, терговдаги кўрсатмаларингизни тасдиқлайсизми? Тергов жараёнида Сизга ҳеч қандай тазйиқ ўтказилмаганми?”, деб сўради. Судланувчи саволга жавоб берар экан “Бунақа терговда биринчи марта иштирок этишим, қийноқ бўлиб қийноқмас, дўқ уришлар бўлди”, деди. Судья эса “Сизни ҳақорат қилишдими? Аниқроқ айтинг”, деди.
Судланувчининг қўшимча қилишича, тергов жараёнида унга терговчилар томонидан эмас, тезкор хизмат вакиллари томонидан қўпол муносабат бўлган.
“Аёл киши учун бақир-чақирлар ҳам руҳий босим”, — дейди судланувчи.
Судья мазкур ҳолатга муносабат билдирар экан, “Адвокатингиз билан келишиб, бир тўхтамга келинг, ва бу ҳақда судга билдиринг, агар терговда менга тазйиқ ўтказилган деб ҳисобласангиз, биз буни ўрганамиз”, — деди.
Судья шунингдек, судланувчи М.Н. ва ҳиндистонлик судланувчи С.Р.П.нинг адвокати бир киши эканлигини (Даврон Аҳмадов), уларнинг кўрсатувларида қарама-қаршилик борлигини айтиб, М.Н.га адвокатни ўзгартиришни таклиф қилди. Агар у адвокатини ўзгартирмаса, адвокат Даврон Аҳмадовни уни ҳимоя қилишдан четлатиб, давлат ҳисобидан адвокат билан таъминлашини маълум қилди. Судланувчи ўз адвокатини ўзгартиришга рози бўлди. Шу сабабли унинг сўроғи янги адвокат ишга киришгунча тўхтатилди.
Изоҳ (0)