Қашқадарёлик тадбиркорга Сурхондарё вилояти прокуратурасини, Деҳқонобод туман прокуратураси ва ИИБ ходимларини, шунингдек, Қашқадарё прокуратурасининг айрим ходимларини сотиб олдинг деган Бойсун прокурори ўринбосарига хизмат текшируви тайинланди. Бу ҳақда “Дарё”га тадбиркорнинг ўзи маълум қилди.
Бойсун прокурори ўринбосари Намоз Авазов аввалроқ Деҳқонобод туманида каврак шираси ва данагини экспорт қилиш билан шуғулланиб келган тадбиркорни экологияга зарар етказиш, шунингдек, афғон фуқаросидан 53 минг доллар пулни олиб, вақтида маҳсулот етказиб бермаганликда айблаётгани хабар берилганди. Яна бир тадбиркорнинг хабар беришича, “зампрокурор” уни ҳам Сурхондарё вилояти прокуратураси, Деҳқонобод туман прокуратураси, ИИБ ходимлари ва Қашқадарё прокуратурасининг айрим ходимларини сотиб олишда айблаган.
Сен Сурхондарё вилояти прокуратурасини ҳам сотиб олдинг. Мен ҳаммасини биламан. Сурхондарё вилоят ИИБ тергов бошқармаси бошлиғи Хуршид билан ҳам яхшилигингни биламан, Лазиз билан яхшилигингни ҳам биламан. Худодан қўрқ, бировнинг пули-ку. Ҳаром еб уялмайсанми? Сенга ўхшаган зўрлар Деҳқонобод туман прокуратуранинг болаларини сотиб олгансан, ИИБни сотиб олгансан. Қашқадарё вилоят прокуратурасининг айрим ходимларини сотиб олгансан, шу бечоранинг пулини уларга едиртириб, ўзинг ҳам еб юргансан, дейди телефон орқали яна бир тадбиркорни қоралаган Бойсун прокурори ўринбосари.
Тадбиркорнинг “Дарё”га қўшимча қилишича, “зампрокурор”нинг бу иши Сурхондарё вилояти прокурори ўринбосари Т.Қурбоновнинг назоратига олинган.
Вилоят прокурори ўринбосарининг менга расмий хат орқали жавоб беришича, Бойсун прокурори ўринбосарининг менга айтган айбловлари ва туҳматлари сабаб унга хизмат текшируви тайинланган. “Зампрокурор” касб одоби талабларини бузишда айбланиб, унга нисбатан чора кўриш масаласида йиғилган ҳужжатлар вилоят прокуратурасининг тегишли бўлимига юборилган, дейди тадбиркор Ойбек Жўраев.
Аввалроқ Бойсун прокурори ўринбосари Намоз Авазов бошқа бир тадбиркорни прокурорнинг лайчаси ва киссаси деб атагани учун суд қарорига кўра 6 миллион 800 минг сўм миқдорида жаримага тортилгани маълум бўлганди.
Изоҳ (0)