Samsung Electronics директорлар кенгаши раиси Чжэ Ли Ёнг қимматли қоғозлар билан боғлиқ фирибгарликда айбсиз деб топилди, деб хабар берди Yonhap ахборот агентлиги. Унга қарши суд жараёни деярли уч йил-у олти ой давом этди.
Жанубий Корея прокуратураси 2020 йил сентябрида Лига қарши айбловлар қўйган. У акциялар нархини манипуляция қилишда, молиявий ҳисоботлар бўйича фирибгарликда ва 2015 йилда Samsungънинг икки бўлинмаси – Samsung C&Т ва Cheil Industries ўртасидаги шубҳали битимга алоқадорликда гумон қилинган.
Тергов маълумотларига кўра, 2015 йилда молиявий ҳисоботлар бўйича фирибгарлик натижасида Samsung Biologiss компаниясининг қиймати 4,5 триллион вонга оширилган. Натижада Biologiss Samsung C&Т билан бирлашганда компаниянинг асосий акциядори Cheil Industries’нинг ҳам қиймати сунъий равишда ошган.
Прокурорларнинг таъкидлашича, Чжэ Ли Cheil Industries компаниясининг асосий акциядорларидан бири бўлган ва фирибгарлик фаолиятидан асосий фойда олувчи бўлган.
Бугун бўлиб ўтган судда судья ишдаги бир қатор номувофиқликлар борлигини, жумладан, Чжэ Ли акциядорларни чалғитувчи маълумотлар берганини тасдиқловчи далилларнинг етишмаслигини таъкидлади.
Ли 2014 йилда отаси соғлиғи сабабли нафақага чиққанидан сўнг Samsung Group бошқарувини қўлга олди. 2017 йил бошида у мамлакатнинг биринчи аёл президенти Пак Кин Хенинг коррупция иши бўйича тергов доирасида порахўрликда айбланган эди. Шундан сўнг, у бир йилга яқин вақтни қамоқда ўтказди ва 2018 йилда озодликка чиқди. 2022 йил октябрь ойида эса Samsung Electronics директорлар кенгаши раиси этиб тайинланди.
Изоҳ (0)