Турк сериалларини томоша қилишни яхши кўрадиган, аммо қайси фильм кўришни билмаётганлар учун сериаллар кетма-кетлигини тақдим қиламиз.
«Яхши ва ёмон кунда»
«Ижарага севги» сериалидаги роли билан яхши таниш бўлган Элчин Сангу иштирокидаги фильм премьераси кузнинг бошида бўлиб ўтган. Фильм сюжети тўй кунида бўлажак куёвнинг йўқолиб қолиши ва орадан йиллар ўтиб пайдо бўлишини ташкил қилади. Қизиғи, қиз қаҳрамон ташлаб кетган йигитининг тўй маросимини ташкил қилишига тўғри келади.
«А.Риза»
Бу сериал икки турли оламнинг бир-бирини севиб қолган вакиллари ҳақида. Али Риза камбағал оиланинг фарзанди бўлади. Ота-онаси уни ҳайдовчилик қилади деб ўйлайди, аслида эса у мафиозларга қарши курашади. Унинг севгилиси Халиде эса мафия олами вакилининг қизи. Сериалнинг эндигина 4 қисми экран юзини кўрган.
«Янги ҳаёт»
Собиқ махфий хизмат ходимининг ҳаёти бизнесмен рафиқасининг қўриқчисига айланганидан кейин буткул ўзгаради. Ҳар иккисининг ҳам оиласи бўлишига қарамай, бир-бирига нисбатан илиқликни ҳис қила бошлайди ва тақдири билан боғлиқ қийин танлов қилишига тўғри келади.
«Мария ва Мустафо»
Сериал сюжети обрўли турк хонадони фарзанди бўлган Мустафонинг Европадан Каппадокияга экскурсия учун келган Мария исмли қизни севиб қолиши ва оиласининг турли эътиқоди, ижтимоий аҳволи ва маданияти сабаб турмуш қуришига тўсқинлик қилишига асосланган.
«Маъсумлар хонадони»
Гулсерен Будайжиўғлунинг машҳур асари асосида суратга олинган сериал сюжетини психолог сифатида ишлайдиган опа-сингилларнинг ҳаёти ташкил қилади. Воқеалар уларнинг акаси уйга янги келинни олиб келгани ва барча бир уйда яшаб, бир оила бўлиб бирлашиши асосида ривожланади.
«Агентимга қўнғироқ қилинг»
Истанбулга болаликдаги орзусини амалга ошириш — кино оламига қадам қўйиш учун ташриф буюрган Диже исмли қиз ҳаёти фильм сюжетини ташкил қилади. У актёрлик агентлигида ёрдамчи сифатида фаолиятини бошлайди ва турли қийинчиликларга дуч келади.
«Кимсасизлар»
«Ичкарида» сериалидаги роли билан таниш бўлган Кубра Сузгун ва «Қизим»да иштирок этган Берен Гўкйилдиз роль ижро қилган сериал сюжети турли сабабларга кўра етимхонага келиб қолган болалар билан боғлиқ воқеалар ҳақида. Уни томоша қилиш орқали етимхоналардаги муҳит ва болалар қийинчиликларни қандай енгишига гувоҳ бўлса бўлади.
Мавзуга доир:
Изоҳ (0)