Саиф Али Хон “Патауди наваби” князлик унвонига эга, аммо у ўз меросини яхшигина пул эвазига сотиб олишга мажбур бўлди. Отаси Мансур Али Хон вафот этгач, аждодларидан қолган сарой Неемрана меҳмонхонасига ижарага берилади. Кейинчалик Саифдан саройни қайтариб олмоқчимисиз, деб сўрашганда у шундай деб жавоб беради.
“Мен уларга уйни сотиб олмоқчи эканимни айтдим, улар эса ақл бовар қилмас сумма 800 крор (8 миллиард рупийга тенг) сўрашди. Ҳа, бизнинг оиламиз тарихи, маданияти, чиройли фотосуратлари бор. Мен оиламиздан яхши тарбия олдим, аммо меросни эмас”.
Саифнинг асл исми — Сажид. У 1970 йил 16 августда Мумбайда Ҳиндистон крикет жамоаси сардори Мансур Али Хон ва унинг рафиқаси актриса Шармила Тагор оиласида туғилган.
1971 йилда мамлакат ҳукумати унвонларни ва қирол оилаларига ҳукмронлик даврида ҳадя қилинган ер, мулк ва меросни бекор қилади. Лекин бунинг эвазига Саифнинг бувиси Сожида Султонга Деҳлидан катта уй совға қилинади. Шундай қилиб, ўғиллари туғилгандан кўп ўтмай, Мансур ва Шармила Мумбайни тарк этиб, шу катта уйга кўчиб ўтишади.
Саифнинг айтишича, унинг бутун болалиги спорт залида ўтган. Аслида унга отасининг касби онасининг кино саноатидаги карьерасидан кўра кўпроқ таъсир қилган. У тиниб-тинчимас ўсмир эди. Эрталабдан кечгача зиёфат ва дискотекада бўлар, уйда деярли кўринмасди.
Ўғлининг бепарво ёшлигидан хавотирланган ота уни реклама агентлигига ишга жойлаштиради. Саиф буни кулиб эслайди: “Менинг вазифаларимдан бири диний календарлар ясаш эди. Уларнинг барчасида мен ҳал қилишим керак бўлган ягона савол бўларди: Вишну худосини октябрь календарига жойлаштириш керакми ёки ноябрга? Мен бу ишга умуман қизиқмасдим”.
Ҳайрон қоласиз, лекин Саиф ёшлигида ўзини жуда хунук ҳисоблаган. “Мен қизболасифат, уятчан, ўзига ишончсиз йигит эдим. Байрамларимдан чарчаган ота-онам мени Англияга ўқишга юборишди. Аввал Винчестер коллежига, кейин эса Оксфордга юборишни режалаштиришган. Лекин мен у ерга ҳеч қачон бормаганман. Чунки ҳаётда ҳеч нарсага жиддий қарамасдим”.
Ҳиндистонга қайтиб келганимда режиссёр Ананд Маҳендру менга фильм таклиф қилди. Бомбейга кўчиб ўтиш фикри ичимда қўрқув билан жаранглади!”
Шундай қилиб, Саиф қочиб кетади — уйдан ота-онасининг рухсатисиз чиқиб кетади. Карьерасини кинога алоқаси бўлмаган кўплаб актёрлар каби бошлайди: рол учун кураш, ижарага олинган кичкина квартира, режиссёрлар билан танишиш. Илгари у фақат Америка фильмларини томоша қилган, ҳинд кинолари уни қизиқтирмасди. Умуман олганда кино уни ҳайратда қолдирмайди. У онасининг бир қанча фильмларини томоша қилган, бироқ экранда унинг кўз ёшларига чидай олмаганини тан олади.
Саифнинг биринчи продюсери Сатти Шори эди (билмаганлар учун бу Мона Шорининг онаси ва Аржун Капурнинг бувиси). У Саифга ҳафтасига 1 000 рупий тўлаган. Аммо улар устида иш бошлаши керак бўлган лойиҳа тўхтатиб қўйилади. Кейинчалик Раҳул Равайл Хонни “Ҳақиқий севги” фильмига таклиф қилади.
Бироқ Саиф бу лойиҳани ҳам бой беради. Унинг ўрнига Камол Садана бош ролни ўйнайди. 90 йилларнинг бошларида барча ҳинд журналларида шов-шувли хабар тарқалади — актриса Шармила Тагорнинг ўғли фильмда дебют қилишга тайёрланаётганди, лекин у маст ҳолда суратга олиш майдончасига келган ва фильмдан ҳайдалган.
Аслида Саиф раҳбарларга бўйсунмаганди. У кун бўйи шунчаки бўш ўтиради, ҳаммаси қанчалик жиддий эканини тушунмайди. “Мен қўпол ва масъулиятсиз йигит эдим. Ўшанда ишга бўлган муносабатим туфайли кетишимни талаб қилишган, деб ўйлайман”, — дея тан олади у.
Аммо суратга олиш майдончасида у актриса Амрита Сингх билан танишиб қолади ва дарҳол унга уйланади.
“Ҳа, мен уйдан қочиб, 20 ёшда уйландим. Ота-оналаримиз қарши эди, лекин кейин бизни кечиришди. Бугун ҳаётга жиддий қарашни ўргатган ягона одам бўлгани учун собиқ хотинимдан миннатдорман.
Рафиқам менга бепарволик билан мақсадга эришиб бўлмайди, деганди. Ўшанда Яш Чопра “Ёзилмаган қонун” романтик драмасига таклиф қилиб қолди”, — деб эслайди Саиф.
“90 йилларда сиз маълум бир қолипларга мос келишингиз керак эди. Бизга тажрибамизни ошириш учун кўп таклиф бўлмасди. Бошқалар 15 та фильмда суратга тушаётган бир пайтда Амир Хон йилига атиги 5 та фильмда рол ўйнашини айтганди. Мен эсс оддий фильмларни танлардим, асосийси улардаги мусиқа зўр эди. Ролнинг қанақалиги мен учун муҳим эмасди”.
Хон ҳеч қачон икки бош қаҳрамон иштирокидаги фильмларни рад қилмаган. 90 йиллар унинг иштирокидаги “Севги билан ҳазиллашилмайди", “Мендан ўзиб кетишга уринма” ва “Биродарлик ришталари” каби кўп юлдузли хитлар билан ажралиб туради. 2000 йилларнинг бошларида “Ошиқ қалблар” ва “Эрта келадими ёки йўқ” култ лойиҳалари чиқади.
2009 йилда “Муҳаббат кеча ва бугун” мелодрамасига Саиф Али Хон продюсерлик қилади. Кейинчалик актёр янги амплуа “Агент Винод” триллери ва “Гоага бориб келамиз” номли комедиясини чиқаради. Саиф шунингдек, веб-сериалларда иштирок этган биринчи Болливуд юлдузи эди. 2018 йилда у икки фаслдан иборат 16-қисмли “Муқаддас ўйинлар” сериалида рол ўйнайди.
Ҳозирда веб-лойиҳаларда биринчи даражали актёрларни кўриш одат тусига кирган, Хон фаолиятининг бошида такаббурлиги билан шуҳрат қозонган, аммо кейинчалик “шоу-бизнесдаги энг катта ва ҳурматли юлдузлардан бири”га айланган. Унинг фильмографиясида юқори даражадаги асосий лойиҳалар ва мустақил режиссёр сифатида ишлаган оммабоп фильмларни ўз ичига олади.
Саиф билан мулоқот қилган одамлар у билан фалсафа ва сиёсатдан тортиб спорт, китоб ва мусиқагача ҳар қандай мавзуда гаплашишлари мумкинлигини айтишади.
Унинг биринчи никоҳи ҳавас қиларли бўлмади. Иккинчи турмуши Раж Капурнинг невараси Карина Капур билан оила қурганига 10 йилдан ошди.
Биринчи турмушидан актёрнинг икки фарзанди бор — қизи Сара Али Хон, у ҳам актриса ва ўғли Иброҳим Али Хон — Болливудда дебют қилиш арафасида.
Иккинчи никоҳидан эса икки ўғли вояга етмоқда — Таймур ва Жеҳ. Мухлислар ёш бўлишига қарамай, улар ҳам отасининг изидан боришларига шубҳа қилишмайди. Кўп фарзандли ота эса хурсанд — унинг кинодаги йўлини давом эттирадиган меросхўрлари бор.
Изоҳ (0)