Ўзгидромет 2024 йилнинг октябрь ойи қандай ўтгани ҳақида маълумот берди.
Қайд этилишича, ой ҳарорат тартиби бўйича ўртача кўп йиллик қийматларга яқин бўлди, фақат республиканинг энг чекка жанубида ўртача ойлик ҳаво ҳарорати меъёрдан 1,5-2 даражага юқори бўлди.
Ойнинг биринчи ўн кунлиги ҳаво жуда илиқ бўлиши кузатилди. Кундузги ҳаво ҳарорати асосан 23-28 даража атрофида бўлди. Энг илиқ кунларда ҳаво 30-32 даражагача, жанубда 34-36 даражагача исиди.
Иккинчи ва учинчи ўн кунликларда ҳаво ҳароратининг кескин ўзгариб туриши кузатилди. Илиқ тўлқинлар даврида кундузи ҳаво 28-31 даражагача, жанубда 32-34 даражагача исиди, совуқ ҳаво кириб келган даврларда эса ҳарорат 10-15 даражагача пасайди.
Энг совуқ кечаларда термометр устуни 2-5 даража илиққача пасайди, республиканинг шимолида ва чўл ҳудудларида эса 1-3 даража совуққача, Қорақалпоғистон Республикасининг айрим жойларида 4-6 даража совуққача бўлган биринчи кузги совуқлар кузатилди.
Ўзгидрометга кўра, 2024 йил октябрь ойи жуда ёмғирли бўлди. Республика ҳудудининг катта қисмида ёмғир октябрь ойида одатдагидан тез-тез ёғди ва ёғингарчиликмиқдори ойлик меъёрдан 2-4 марта кўп бўлди.
Фарғона водийси ҳудудининг катта қисмида, Қизилқум чўлининг айрим жойларида ва Нурота тизмаси ҳудудида октябрь ойида ёғган ёғингарчилик миқдори бўйича барча кузатув қаторлари учун энг ёғингарчилик кўп бўлган учликка кирди.
Октябрь ойида одатда жуда кам ёмғир ёғадиган айрим қурғоқчил ҳудудларда ойлик ёғингарчилик миқдори меъёрдан 6-8 марта (Навоий ва Қоракўл метеостанциялари ҳудудида), Бухоро метеостанцияси ҳудудида эса 14 марта кўп бўлди.
Ушбу ҳудудларда ой метеорологик кузатувларнинг барча йиллари учун энг ёмғирли бўлди. Қорақалпоғистон Республикаси, Хоразм вилоятининг қатор туманларида ва Қизилқум чўлининг ғарбий қисмидаги баъзи жойларда ёғингарчилик меъёдан кам бўлиши кузатилди.
Энг жадал жала ёмғирлар 14-16 октябрь кунлари бир қатор вилоятларда ёғиб ўтди. Тошкент, Жиззах, Сирдарё, Наманган вилоятларининг кўпчилик ҳудудларида, Самарқанд, Андижон, Фарғона вилоятларининг баъзи жойларида бир кеча-кундузда
20 миллиметрдан 37 миллиметргача, айрим жойларда 40-46 миллиметргача, тоғолди ва тоғлари ҳудудларда 55-76 миллиметргача, Қамчиқ довони ҳудудида 109 миллиметргача ёғди.
Шу кунларда Тошкент вилоятининг тоғли ҳудудларида ва Қамчиқ довони ҳудудида ушбу мавсумдаги биринчи қор қоплами қайд этилди. Баланд тоғли ҳудудларда қор баландлиги 15-20 сантиметрга етди. Метеорологик кузатувларнинг бутун тарихи давомида октябрь ойида ушбу кунларда баъзи жойларда бир кеча-кундузлик ёғингарчилик миқдори рекордлари янгиланди.
Ойнинг иккинчи ярмида республика бўйича баъзи жойларда туман кузатилди. Жанубда ва чўл ҳудудларда шамол тезлиги 15-20 метр/секундгача бўлганда, чанг-тўзонлар кузатилди.
Изоҳ (0)