O‘zgidromet 2024-yilning oktyabr oyi qanday o‘tgani haqida maʼlumot berdi.
Qayd etilishicha, oy harorat tartibi bo‘yicha o‘rtacha ko‘p yillik qiymatlarga yaqin bo‘ldi, faqat respublikaning eng chekka janubida o‘rtacha oylik havo harorati meʼyordan 1,5-2 darajaga yuqori bo‘ldi.
Oyning birinchi o‘n kunligi havo juda iliq bo‘lishi kuzatildi. Kunduzgi havo harorati asosan 23-28 daraja atrofida bo‘ldi. Eng iliq kunlarda havo 30-32 darajagacha, janubda 34-36 darajagacha isidi.
Ikkinchi va uchinchi o‘n kunliklarda havo haroratining keskin o‘zgarib turishi kuzatildi. Iliq to‘lqinlar davrida kunduzi havo 28-31 darajagacha, janubda 32-34 darajagacha isidi, sovuq havo kirib kelgan davrlarda esa harorat 10-15 darajagacha pasaydi.
Eng sovuq kechalarda termometr ustuni 2-5 daraja iliqqacha pasaydi, respublikaning shimolida va cho‘l hududlarida esa 1-3 daraja sovuqqacha, Qoraqalpog‘iston Respublikasining ayrim joylarida 4-6 daraja sovuqqacha bo‘lgan birinchi kuzgi sovuqlar kuzatildi.
O‘zgidrometga ko‘ra, 2024-yil oktyabr oyi juda yomg‘irli bo‘ldi. Respublika hududining katta qismida yomg‘ir oktyabr oyida odatdagidan tez-tez yog‘di va yog‘ingarchilikmiqdori oylik meʼyordan 2-4-marta ko‘p bo‘ldi.
Farg‘ona vodiysi hududining katta qismida, Qizilqum cho‘lining ayrim joylarida va Nurota tizmasi hududida oktyabr oyida yog‘gan yog‘ingarchilik miqdori bo‘yicha barcha kuzatuv qatorlari uchun eng yog‘ingarchilik ko‘p bo‘lgan uchlikka kirdi.
Oktyabr oyida odatda juda kam yomg‘ir yog‘adigan ayrim qurg‘oqchil hududlarda oylik yog‘ingarchilik miqdori meʼyordan 6-8 marta (Navoiy va Qorako‘l meteostansiyalari hududida), Buxoro meteostansiyasi hududida esa 14 marta ko‘p bo‘ldi.
Ushbu hududlarda oy meteorologik kuzatuvlarning barcha yillari uchun eng yomg‘irli bo‘ldi. Qoraqalpog‘iston Respublikasi, Xorazm viloyatining qator tumanlarida va Qizilqum cho‘lining g‘arbiy qismidagi baʼzi joylarda yog‘ingarchilik meʼyodan kam bo‘lishi kuzatildi.
Eng jadal jala yomg‘irlar 14-16 oktyabr kunlari bir qator viloyatlarda yog‘ib o‘tdi. Toshkent, Jizzax, Sirdaryo, Namangan viloyatlarining ko‘pchilik hududlarida, Samarqand, Andijon, Farg‘ona viloyatlarining baʼzi joylarida bir kecha-kunduzda
20 millimetrdan 37 millimetrgacha, ayrim joylarda 40-46 millimetrgacha, tog‘oldi va tog‘lari hududlarda 55-76 millimetrgacha, Qamchiq dovoni hududida 109 millimetrgacha yog‘di.
Shu kunlarda Toshkent viloyatining tog‘li hududlarida va Qamchiq dovoni hududida ushbu mavsumdagi birinchi qor qoplami qayd etildi. Baland tog‘li hududlarda qor balandligi 15-20 santimetrga yetdi. Meteorologik kuzatuvlarning butun tarixi davomida oktabr oyida ushbu kunlarda baʼzi joylarda bir kecha-kunduzlik yog‘ingarchilik miqdori rekordlari yangilandi.
Oyning ikkinchi yarmida respublika bo‘yicha baʼzi joylarda tuman kuzatildi. Janubda va cho‘l hududlarda shamol tezligi 15-20 metr/sekundgacha bo‘lganda, chang-to‘zonlar kuzatildi.
Izoh (0)