Бир вақтлар куз фасли келиши билан одамлар совуқ кунлар учун озиқ-овқат ғамлаб олиш пайига тушишган. Ҳозирда эса бунга эҳтиёж қолмаган, аммо айрим нарсалар, мисол учун, куз фаслига хос бўлган тушкунлик кайфиятини технологик имкониятлар билан енгиш осон ва ёқимлироқ эканлигини унутмаслик фойдали бўлади. Шу боисдан ҳам куз фаслида кунларингиз янада ёқимли бўлишига ёрдам берадиган бир нечта ажойиб гаджетлар тўпламини тайёрлаб қўйдик.
Оpus One Jonas смарт соябони
Куз фаслида ёмғирдан ҳимояланиш учун жуда керакли буюм. Бироқ бу ақлли ёмғирпўшнинг сизга қўл келиши мумкин бўлган ягона имконияти эмас. Биринчидан, ушбу ажойиб буюм телефонга уланади ва уни бирор ерда унутиб қолдирсангиз, телефонингиз бу ҳақда сизга дарров эслатади. Иккинчидан, ёмғирпўш тутқичдаги индикатор ёрдамида об-ҳавога оид маълумотларни ҳам тақдим этади. Ҳа, айтгандай, у жуда чиройли ва замонавий кўринишга эга.
ZMI брендидан қиздирувчи повербанк
Эндиликда ихчамгина қувватлаш қурилмаси нафақат смартфонингиз, балки қўлларингиз ҳақида ҳам қайғуради. Ундан ишга кетаётган, сайр қилаётган вақтингизда ёки иситиш тизими ҳали тўлиқ ишга тушмаган ҳолатларда уйда бўлганингизда ҳам фойдаланишингиз мумкин. Ишонтириб айтамизки, девайс сизга ёқиб тушади. Повербанкнинг қувватини смартфон учун ҳам қолдиришни унутманг.
Sеnsоrее’дан GER “кайфият” свитери
Баъзан кайфият бўлмаган вақтларда ҳеч ким билан гаплашгингиз келмайди, оддийгина “Салом” деган сўзнинг ўзи ҳам асабларингизни таранг ҳолатга келтиради. Таниш вазият, тўғрими? Ундай бўлса, ушбу свитер сизга жуда мос келади. Ортиқча гап-сўз ўзингиз ва атрофдагиларга зарар етказмаслиги учун свитерни кийиб олсангиз кифоя. Нима ҳам дердик, кузги кайфият шундай-да.
Gradо Zerо Espace’дан енглари узаядиган смарт кўйлак
Ҳаво ҳарорати совиб кетган вақтда ҳам севимли кўйлагидан айрилишни истамайдиган одамлар учун ажойиб топилма. Албатта, ушбу замонавий либос октябрь ойининг барча инжиқликларига бардош бера олмайди. Аммо унинг сизга ёрдами тегиши шубҳасиз. Гап шундаки, кўйлак ҳаво ҳароратига нисбатан таъсирчан материалдан тайёрланган. У ҳарорат ўзгаришига қараб қабул қилинган маълумотлар асосида енгларни узайтириб ёки калталатиб беради.
Xiaomi’дан “ақлли” ароматизатор
Ташқаридан бир қучоқ гул йиғиб келиш, ҳаттоки деразаларни очиш ҳам имконсиз бўлган фаслда Xiaomi вазиятдан чиқишга ёрдам беради. Mijiа Smart Fragrance Machine қурилмаси уй ичидаги мусаффолик ва ёқимли ҳидни сақлашга кўмаклашади. Бунга қўшимча равишда ажойиб тунчироқ вазифасини ҳам ўтайди.
Ишда мизғиб олиш учун АТЕХ Sо.дан ёстиқча
Тан олиш керак, баъзан ишда мизғиб олишни ҳаммамиз хоҳлаймиз. Аммо бунинг ноқулай томонлари жуда кўп: баъзида пешонангиз оғриб қолади, баъзида қўлларингиз увишади. Хавотирланманг, ушбу муаммонинг ечими мавжуд. Ҳар қалай, АТЕХ Sо. компанияси айнан шундай фикрда ва у ишда мизғиб олиш учун махсус гаджет тақдим этди. Агар раҳбарингиз гаджетни кўриб, унинг нима эканлигини сўраса, ҳазил тариқасида махфий ишланмани синовдан ўтказаётганингиз ҳақида айтишингиз мумкин.
Bigscreen Beyond VR кўзойнаклари
Айни вақтда бутунлай бошқа жойда бўлиб қолишни ким ҳам хоҳламайди дейсиз? Узоқ ўлкадаги пляж ёки ёввойи ўрмонда пайдо бўлиб қолишга йўқ демасдингиз, тўғрими? Бу борада сизга Bigscreen’дан VR кўзойнаклари ёрдам беради. Кўзойнак кўп жой эгалламайди, у сизга туҳфа этадиган таассуротлар эса бошқа қурилмаларникидан қолишмайди. Кузнинг зерикарли оқшомлари учун айни муддао.
Изоҳ (0)