Самарқандда электр тармоқлари корхонасидан тадбиркорлар фойдасига 400 млн сўмдан ортиқ маблағ ундириб берилади

Самарқандда электр энергияси таъминотини огоҳлантиришсиз ўчирган электр тармоқлари корхонасидан тадбиркорлар фойдасига 400 миллион сўмдан кўпроқ маблағ ундириб берилади, деб хабар беради Zarnews.

Самарқанд шаҳар иқтисодий судининг маълум қилишича, Каттақўрғон туманидаги «Каттақўрғон Валижон парранда» МЧЖ ва «Муродулла Бобо» фермер хўжаликлари полиз экинларини етиштириш мақсадида тижорат банкларининг ҳисобига Хитойдан технология келтириб, иссиқхона қурган.

Иссиқхонани юритиш учун «Самарқанд ҳудудий электр тармоқлари корхонаси» АЖ билан шартномавий муносабатга киришиб, интизомли тўловчи сифатида сарфланган электр энергияси ҳақини вақтида тўлаб келган. Бироқ 2020 йил 18 ноябрдан 19 ноябрга ўтар кечаси 6 соат мобайнида ҳеч қандай огоҳлантиришсиз электр энергияси узиб қўйилган. Оқибатда помидор ва бодринг етиштирилаётган иссиқхонада ҳарорат пасайиб, ҳосил музлаб қолган ва нобуд бўлган.

Ўша куни тадбиркорларга етказилган зарар миқдорини аниқлаш мақсадида Каттақўрғон тумани ҳокимининг ўринбосари, жамиятга хизмат кўрсатувчи банк вакиллари, Фермер, деҳқон хўжаликлари ва томорқа ер эгалари кенгаши туман бўлими раиси, туман ИИБ бошлиғи, қишлоқ хўжалиги боғдорчилик ва иссиқхона хўжаликларини ривожлантириш бўйича туман вакили, туман қишлоқ хўжалиги бўлими мутахассиси ҳамда жамият вакиллари иштирокида далолатнома расмийлаштирилган.

Каттақўрғон тумани прокуратураси томонидан тадбиркорларнинг манфаатини кўзлаб, электр корхонасининг айби билан етказилган зарарни ундириш мақсадида Самарқанд шаҳар иқтисодий судига даъво аризалари киритилган.

Аввалроқ мазкур ҳолатлар бўйича тадбиркорларга етказилган зарар 1 миллиард 54 миллион сўмга баҳолангани тўғрисида хабар берилганди.

Суд низоларни қонун доирасида кўриб чиқиб, жавобгар «Самарқанд ҳудудий электр тармоқлари корхонаси» АЖдан «Каттақўрғон Валижон парранда» МЧЖ фойдасига 88 миллион сўм, «Муродулла Бобо» фермер хўжалиги фойдасига 332,5 миллион сўм етказилган зарарни ундириш ҳақида ҳал қилув қарорларини қабул қилган.

«Ҳудудий электр тармоқлари»нинг «Дарё»га маълум қилишича, суднинг ҳал қилув қарори устидан апелляция берилган.

2020 йилнинг ноябрида «Ҳудудий электр тармоқлари» АЖ «Каттақўрғон Валижон парранда» МЧЖ ҳамда «Муродулла бобо» фермер хўжалиги борасидаги вазиятга изоҳ берар экан, улар электр энергиясига уланишга доир ҳужжатларга амал қилмагани сабабли экилган помидор ва бодринг кўчатларининг бир қисми зарар кўрганини билдирган эди.

Шунингдек, ўрганишлар давомида юқоридаги фермер хўжаликлари билан ёнма-ён ҳудудда жойлашган «Моральний Инвест» хусусий тадбиркор иссиқхонасида ҳам, табиийки, электр энергиясида узилиш бўлгани, бироқ корхона раҳбарияти томонидан электр энергиясига уланишга доир ҳужжатлар талабларига риоя қилингани сабаб 4 гектар майдонга экилган помидор кўчатларига зарар етмасдан, сақлаб қолингани таъкидланганди.

Эслатиб ўтамиз, 2020 йилнинг ноябрида қашқадарёлик тадбиркор уч кун электрсиз қолгани сабаб олти мингта товуғидан айрилган эди.