Samarqand viloyat sudi Iqtisodiy ishlar bo‘yicha sudlov hay’atining taftish instansiyasi MIBning Nishon tuman bo‘limi traktorini noqonuniy olib qo‘yib, 49 kun davomida jarima maydonida saqlashi oqibatida fermerga 355 million so‘m zarar yetkazgani bilan bog‘liq holatni ko‘rib chiqayotgani xabar berilgandi. Sudning, 1-avgust kuni davom etgan navbatdagi majlisida fermer foydasiga MIBning Nishon tumani bo‘limidan 44 million so‘m yo‘qotilgan sof foydani undirish haqida qaror chiqarildi.
Samarqand viloyat sudi Iqtisodiy ishlar bo‘yicha sudlov hay’atining taftish instansiyasi sudlov hay’ati Qarshi tumanlararo iqtisodiy sudining 2024-yil 5-fevraldagi hal qiluv qarori va Qashqadaryo viloyat sudining Iqtisodiy ishlar bo‘yicha sudlov hay’ati apellyatsiya instansiyasining 2024-yil 18-apreldagi qarorini bekor qildi.
Fermer-dehqon xo‘jaliklari va tomorqa yer egalari Nishon tumani kengashining taftish shikoyati qisman qanoatlantirilsin. Yangi qaror qabul qilinsin. MIBning Nishon tumani bo‘limidan “Samandar nur” fermer xo‘jaligi foydasiga 44 million 412 ming so‘m boy berilgan foyda undirilsin. Da’vo talabining qolgan qismlarini qanoatlantirish rad qilinsin, deyiladi sudlov hay’ati qarorida.
Shuningdek, sudlov hay’ati ishni ko‘rish jarayonida fermerga MIB xodimlarining xatti-harakati sabab zarar yetkazilgan degan qarorga keldi. Va bu haqda MIBning Qashqadaryo viloyat boshqarmasiga xususiy ajrim yuborilishini ma’lum qildi.
Da’vogar manfaatini himoya qilgan Qashqadaryo viloyat Fermer-dehqon xo‘jaliklari va tomorqa yer egalari kengashining huquqiy masalalar hamda fermer dehqon xo‘jaliklari va tomorqa yer egalari huquqlarini himoya qilish bo‘yicha bosh mutaxassisi To‘lqin Shoimovning “Daryo”ga qo‘shimcha qilishicha, endilikda fermerga yetkazilgan zararni qoplash bo‘yicha ham sudga shikoyat kiritiladi.
Boy berilgan soy foydani undirdik. Shuningdek, MIB xodimlarining xatti-harakati noqonuniy ekani va ularning harakati oqibatida fermerga zarar yetgani tasdiqlandi. Qashqadaryo viloyat Fermer-dehqon xo‘jaliklari va tomorqa yer egalari kengashi endilikda fermerga yetkazilgan zararni qoplash bo‘yicha sudga shikoyat qilib, “Samandar nur” fermer xo‘jaligini qo‘llab-quvvatlashda davom etadi, deydi To‘lqin Shoimov.
Sudning avvalgi majlislarida biznes-ombudsman devonining Qashqadaryo viloyatidagi vakili Ismoil Sayitov MIB ijrochilarining xatti-harakatida qonunga zidlik borligini aytib, ular shuningdek, mansab vakolatlarini ham suiiste’mol qilganini ta’kidladi. Suddan jinoiy ish qo‘zg‘atish to‘g‘risida prokuraturaga xususiy ajrim chiqarishni so‘ragandi.
Izoh (0)