Samarqand viloyat sudi Iqtisodiy ishlar bo‘yicha sudlov hay’atining taftish instansiyasi MIBning Nishon tuman bo‘limi traktorini noqonuniy olib qo‘yib, 49 kun davomida jarima maydonida saqlashi oqibatida fermerga 355 million so‘m zarar yetkazgani bilan bog‘liq holatni ko‘rib chiqmoqda. Bu haqda “Daryo” jurnalisti xabar berdi.
Sudya Murodov raisligida, tomonlar va prezident huzuridagi Tadbirkorlik subyektlarining huquqlari va qonuniy manfaatlarini himoya qilish bo‘yicha vakil ishtirokida 2024-yilning 22-iyul kuni soat 16:30 da boshlangan sud majlisida OAV vakillari ishtirokiga ruxsat berildi, biroq javobgar tomon noroziligiga asosan jurnalistlarga foto va video olishga taqiq qo‘yildi.
Sudda aniqlashtirilishicha, MIBning Nishon tumani bo‘limi xodimlari “Samandar nur” fermer xo‘jaligining 35 million so‘mlik soliq qarzdorligini undirish uchun 2022-yil 1-fevraldan 23-oktyabrgacha 5 ta ijro ishi qo‘zg‘atish to‘g‘risida qarorlar qabul qilinishiga qaramasdan, fermerni ijro ishi qo‘zg‘atilgani to‘g‘risidagi qarorlar bilan tanishtirmagan holda garovda turgan haydov traktorini xatlagan. Va texnikani auksionda sotish uchun fermer dalasidan oldindan ogohlantirishsiz olib ketgan.
Shundan so‘ng fermer qarzdorlik noto‘g‘ri hisoblanganini, oldindan bu haqda ogohlantirilganda, masalaga oydinlik kiritib, qarzini to‘lagan bo‘lishini bir necha bor ta’kidlashiga qaramasdan, davlat ijrochilari bularni e’tiborsiz qoldirgan.
Bundan tashqari, 35 mln so‘mlik qarzdorlik uchun undiruv nomutanosib miqdordagi mulkka, ya’ni 977,5 mln so‘m kredit mablag‘i evaziga sotib olingan traktorga qaratilib, olib ketilgan.
2024-yilning 5-fevral kuni ishni ko‘rib chiqqan Qarshi tumanlararo iqtisodiy sudi Majburiy ijro byurosining Nishon tumani bo‘limidan mening foydamga 355 million so‘m undirish to‘g‘risida qaror chiqargandi. Nega buncha zarar va bu mablag‘ nima uchun menga to‘lab berilishi kerak degan savol tug‘ilishi tabiiy. Agar MIBning tuman bo‘limi noqonuniy xatti-harakatni amalga oshirib, texnikamni 49 kun noqonuniy ushlab turmaganida men 57 ta fermer xo‘jaligi bilan tuzilgan shartnoma shartlarini bajarib, ushbu traktor yordamida kuniga 7 million 249 ming so‘mdan, jami 355 million so‘m daromad topgan bo‘lar edim. Shu sabab MIB keltirilgan zararni qoplab berishini talab qilyapmiz, dedi sudda so‘z olgan fermer.
Sudlov hay’ati fermerga savol bilan yuzlanar ekan, fermer xo‘jaligida traktorchi-mexanik shtati bor-yo‘qligi va traktorchilarga aytilayotgan muddatda qancha maosh to‘lab berilgani bilan qiziqdi. Fermer da’vosini qo‘llab-quvvatlayotgan Nishon tuman fermer, dehqon xo‘jaliklari va tomorqa yer egalari Kengashi vakili hamda fermer bunday hujjatlar mavjudligini, keyingi sudda taqdim qilishini bildirdi. Fermer shuningdek, u bilan yer haydash bo‘yicha shartnoma qilgan 57 ta fermer xo‘jaligi rahbarlarini sudga guvoh sifatida taklif qilishni so‘radi. Sud bu haqda rasmiy iltimosnoma kiritilsa, muhokama qilishini aytdi.
Sudda javobgar tomon vakili sifatida ishtirok etayotgan MIBning Nishon tuman bo‘limi boshlig‘i o‘rinbosari Zayniddin Bozorov fermer da’vosini rad etmoqda.
Sud 2024-yilning 29-iyul kuni soat 11:00 ga qadar qisqa muddatli tanaffus e’lon qildi.
Izoh (0)