Qashqadaryo viloyatida MIB va uning mansabdorlari, “Agrobank”, shuningdek, bankning viloyatdagi masʼullari bilan sudlashib yurgan tadbirkor-fermer qamoqqa olingani aytilmoqda. Bu haqda “Daryo”ga uning opasi maʼlumot berdi.
Sudda mansabdorlarga qarshi kurashayotgan fermerning opasi Gulchehra Boltayevaning aytishicha, ukasi 29-oktyabr kuni ertalab tuman prokuraturasiga chaqirilgan va o‘shandan beri yo‘q.
Ashur ukam “Samandar-nur” fermer xo‘jaligi rahbari edi. U MIB va “Agrobank” mansabdorlari bilan sudlashib yurgandi. 29-oktyabr kuni tuman prokuraturasiga chaqirilgandi. O‘shandan beri yo‘q. 1-noyabr kuni sud bo‘lishi va bu safargi sudda ko‘p narsa hal bo‘lishi kerak edi. Kimdir ukamni ichkarida olib o‘tirishdan manfaatdorga o‘xshayapti, deydi Gulchehra Boltayeva.
“Daryo”da avvalroq “Samandar-nur” fermer xo‘jaligi rahbari Ashurali Boltayev MIB yangi traktorini sababsiz olib qo‘yib, noqonuniy saqlab turgani uchun byurodan 355 million so‘m zararni undirish bo‘yicha sudga murojaat qilgani, dastlab unga kompensatsiya puli to‘liq undirilishi belgilangani, biroq ko‘p o‘tmay bu qaror o‘zgarib, fermerning MIBdan faqatgina 44 million so‘mlik sof foydasi undirib berilgani xabar berilgandi. Tadbirkor-fermer shuningdek, “Agrobank”ning Nishon tumani filiali bilan ham sudlashayotgani, bank “Samandar-nur” fermer xo‘jaligi bilan tuzgan 2020-yil 29-oktyabr kundagi 784-sonli kredit shartnomasiga amal qilmay, belgilangan kreditni 93 kun kechiktirib bergani, buning uchun ham bank fermerga jarima to‘lagani ochiqlangandi.
“Daryo” jurnalisti tadbirkor-fermerning ichkariga olinishi sababini bilish maqsadida Qashqadaryo viloyati prokuraturasi axborot xizmati masʼuli bilan bog‘landi. Axborot xizmati rahbari vazifasini bajaruvchi Diyorbek Amirqulov voqeaga aniqlik kiritib, tez orada maʼlumot berishini aytdi.
Izoh (0)