Хонанда ва актриса Азиза Низомова 21 октябрь куни 33 ёшни қаршилади. Мухлисларига ҳамиша позитив кайфиятда кўриниш берадиган ижодкор машҳур ҳуқуқшунослар оиласида туғилгани ва отаси Адлия вазири бўлганидан хабарингиз борми? Хўш, нега у санъат соҳасини танлади ва қўшиқчилик фаолиятини актрисаликка алмаштирди? Келинг, бу каби саволларга қуйида жавоб излаймиз.
“Отам адлия вазири бўлган”
Азиза Низомова 1991 йилнинг 21 октябрь санасида Тошкент шаҳрида дунёга келган. Отаси навоийлик ҳуқуқшунос Фарҳод Низомов, онаси Гавҳар Низомова эса наманганлик бўлиб, информатика ўқитувчиси бўлиб ишлаган. Оилада уч қиз тарбияланган, уларнинг кенжаси Азиза Низомовадир. Ижодкорнинг Доно ва Барно исмли икки опаси бор. Улар ота касбини танлашган.
— Ота-онам ўзлари юрист бўлишига қарамай мени доим қўллаб-қувватлашган. Бизнинг уйимизда фарзандларга нисбатан ҳеч қандай тақиқлар бўлмаган. Санъатга қизиқишим баланд бўлгани учун шу йўлдан кетганман.
Отам Фарҳод Низомов жуда ҳам яхши инсон. Ўзбекистонда хизмат кўрсатган юрист. Ўз вақтида отам адлия вазири бўлган. Жуда ҳам кўп китоб ўқиганлар. Уйимизда ҳалигача катта кутубхона бор, дейди Азиза Низомова.
“Семизлигимдан уялганман”
Азиза Низомова болаликдан санъатга кириб келгани ва Асал Шодиева билан дуэт куйлаган вақтлари уни ҳақорат қилганлардан ранжигани ҳақида гапирди.
— Муяссар опа отамнинг синглиси. Жуда ҳам яхши аёл. Ёшлигимдан уйимизга келиб, менга фортепиано чалишни ўргатардилар. Санъатга болаликдан кириб келганман, баъзан “Шаҳзода, Райҳон билан концертларда бирга саҳнага чиққанмиз”, десам ҳайрон бўлишади. У пайтлари давлат тадбирларида фаол иштирок этардик, “Тошкент” номли қўшиғимиз бор эди. Ўзи болалар 12-13 ёшда ғалати бўлиб қолишади, яъни ташқи кўриниши катта одамга ҳам болага ҳам ўхшамай қолади. Мен семизгина қиз бўлганман ва ташқи кўринишимдан уялардим. Энг ёмони у пайтда инсон анча таъсирчан бўларкан, мактаб партасига ташқи кўринишимни ёмонлаб, ҳақоратли сўзлар ёзиб кетишарди. Бундан роса йиғлардим, дейди Азиза Низомова.
“Яккахон хонанда бўлишга шошилмаганман”
Азиза Низомова нима учун яккахон ижрочи бўлишга интилмагани ва узоқ йиллар бек-вокалда оддий хонанда бўлиб ишлаганини қуйидагича изоҳлайди.
— Яккахон ижрочи бўлиш анча масъулиятли. Мен ўзимга нисбатан талабчан бўлганим учун яккахон ижод қилишга шошилмаганман. Бек-вокалда ишлаб эса тажриба орттирганман, бундан ташқари овоз доимий чархланиб туради, дейди Азиза Низомова.
“Турмуш ўртоғим бизнес партнёрим”
Хонанда тадбиркор инсон билан оила қурган, ҳозирда унинг Миранда исмли қизалоғи бор.
— Турмуш ўртоғим билан тўйда танишганмиз. У дўстининг тўйига келган, мен эса ўша ресторанда қўшиқ куйлаётган эдим. Танишганимиздан 4-5 ой ўтиб турмуш қурганмиз. У киши мендан паспортда бир ёш катта, аммо ақл жиҳатдан анча етук. Бир гаплашгандаёқ кўп китоб ўқийдиган инсон экани сезилади.
Турмуш ўртоғим тадбиркорлик билан шуғулланади. Айни дамда иккимиз бизнес партнёрлармиз десам ҳам бўлади. Чунки тадбиркорликда ҳеч омадим келмасди, кўнглим бўшлиги ҳамиша панд берарди. У инсон эса ҳисоб-китобга уста, тадбиркорликда кўп йўл-йўриқ ўргатади, дейди Азиза Низомова.
“Тўйим бўлишини истамаганман”
Азиза Низомова тўй қилиш нияти бўлгани ва бу ҳолат кўплаб шов-шувларга сабаб бўлгани ҳақида қуйидагиларни маълум қилди.
— Санъаткорлар ҳақида ҳамиша шов-шув бўлади. Ҳаммасига эътибор бериш ва негативлар билан ҳисоблашиш шарт эмас. Ҳар бир инсоннинг ўз принциплари ва режалари бор. Масалан, тўйим билан боғлиқ гап-сўзлар роса тарқаганди. “Иккинчи хотин экан, тўйдан аввал ҳомиладор бўлибди”, шунга ўхшаш гап сўзлар қулоғимга етиб келганди. Мен 18 ёшимда турмушга чиққаним йўқ, турмуш ўртоғим ҳам ёш бола эмасди. Биз аввалига катта тўй қилишни истамадик, никоҳдан ўтиб яшайвердик. Аммо турмуш ўртоғим кутилмаганда тўй қилайлик деб қолди, дейди Азиза Низомова.
“Қўшиқчиликда танаффусдаман”
Азиза Низомова кейинги пайтларда қўшиқчилик соҳасига камроқ эътибор бериб, асосан сериалларда суратга тушмоқда. Хонанда бунинг сабабини қуйидагича изоҳлайди.
— Хонандалик шундай касбки, доим бир оз танаффус қилиб туриш керак. Чунки ҳаддан ташқари узоқ вақт бир соҳада ишласангиз, илҳомингиз кетиб қолади. Ҳозир кўп танишларимда шундай ҳолат кузатилмоқда. Шунинг учун ҳам ижодкорлар ўзи учун танаффус олиб туриши керак.
Сериалларга эса таклифлар кўп, агар маъқул келса, суратга тушаман. Чунки у ҳам ижод. Унда ҳам рол ижро этсам яйрайман, дейди Азиза Низомова. Хонанда ҳозирги кунда иккинчи бор она бўлиш арафасида турибди.
Изоҳ (0)