27 октябрь куни Ўзбекистон Олий Мажлиси Қонунчилик палатаси ва маҳаллий кенгашлар депутатлари сайлови бўлиб ўтмоқда.
Овоз бериш жараёни 11 минг 28 та сайлов участкаларида соат 08:00 да бошланди. Давлат раҳбари Тошкентнинг Мирзо Улуғбек туманидаги 59-сайлов участкасига оила аъзолари билан бирга ташриф буюриб, сайловда овоз беришда иштирок этди.
Тошкентдаги сайлов участкаларида яна бир қатор амалдорлар сайловда овоз берди.
Бош вазир Абдулла Арипов оила аъзолари билан бирга Тошкент шаҳри Юнусобод туманидаги 520-сайлов участкасида овоз берди.
Сенат раиси Танзила Норбоева оила аъзолари билан бирга 576-сайлов участкасида, Қонунчилик палатаси Спикери Нуриддин Исмоилов эса 32-сайлов участкасига бориб, овоз берди.
“Ҳар бир кишининг сайловларда иштирок этишидаги асосий мақсад — парламентдаги сайланган вакиллари орқали ўз келажаги ва яқинларининг келажагига таъсир кўрсатиш имкониятидир”, деди сайловда иштирок этган Танзила Норбоева
Ўзбекистон мусулмонлари идораси раиси, муфтий Нуриддин Холиқназар 576-сайлов участкасига келиб, сайловда овоз берди.
“Ислом манбаларида сайлаш ва сайланиш ҳақида ҳам баён этилган, халқ жамият бошқарувида иштирок этадиган ўз вакилларини сайлаб олиши зарурдир. Шу боис ҳам давлат ва жамият тараққиёти, ижтимоий-иқтисодий ривожланиш, ёшларни илм-маърифатли қилишга ҳисса қўшадиган муносиб номзодларни танлаш ва сайлаш — ўта муҳим масаладир”, деди муфтий Нуриддин Холиқназар.
Маданият вазири Озодбек Назарбеков, рақамли технологиялар вазири Шерзод Шерматов ҳам ўзи муносиб деб билган номзодга овоз берди.
Коррупцияга қарши курашиш агентлиги директори Акмал Бурхонов ҳам сайловда иштирок этиб, сайлаш ҳуқуқи орқали давлат ва жамият ҳаётини янада яхши томонга ўзгартириш имкониятидан фойдаланишга чақирди.
“Бугун мен нафақат ўзим, балки фарзандларим келажаги учун ҳам овоз бермоқдаман”, деди агентлик раҳбари.
Солиқ қўмитаси раиси Шерзод Кудбиев, Ўзбекистон маҳаллалари уюшмаси раиси Қаҳрамон Қуронбоев ҳам сайловда овоз берди.
Қорақалпоғистон Республикаси Жўқорғи Кенгеси раиси Аманбай Оринбаев Нукус шаҳридаги 7-сайлов участкасида, Қорақалпоғистон Вазирлар Кенгаши раиси Фарҳод Эрманов эса Нукус шаҳридаги 83-сайлов участкасида овоз берди.
Марказий сайлов комиссиясининг маълум қилишича, соат 13:00 ҳолатига кўра, 19 944 859 нафар сайловчидан 9 948 589 нафари ёки 47,62 фоизи овоз беришда иштирок этди.
Марказий сайлов комиссияси раиси ўринбосари Баҳром Кучкаровнинг билдиришича, қонунчиликда сайловда сайловчиларнинг 33 фоизи иштирок этса, сайлов ўтган деб топилади. Бу Сайлов кодексининг 96-моддасида белгиланган. Шу сабаб, 27 октябрдаги депутатлик сайловлари ўтган деб ҳисобланди.
Бу йилги сайловларда Сайлов жараёнини бошқаришнинг автоматлашган тизимидаги Сайловчиларнинг электрон рўйхатига Ўзбекистондаги 19 миллион 944 минг 859 нафар сайловчи киритилган. Бундан ташқари, чет эллардаги сайловчилар 165 минг 631 нафарни ташкил этди.
Изоҳ (0)