Ўзбекистонда Lacetti, Cobalt, Nexia каби оммабоп автомобиллар нархлари сезиларли пасайди

Вазирлар Маҳкамаси ҳузуридаги Макроиқтисодий ва ҳудудий тадқиқотлар институти мутахассислари 2024 йилнинг июль-сентябрь ойларида автомобиль нархлари таҳлил қилди. Унга кўра, 2024 йилнинг август ойида автомобиль нархлари июль ойига нисбатан ошган бўлса-да, сентябрь ойида нархларда пасайиш кузатилди.

Маҳаллий оммабоп автомобиллар — Lacetti, Cobalt, Nexia, Spark, Damas, Labo нархлари

2024 йилнинг сентябрь ойида ўртача ва кўп фойдаланилган оммабоп автомобиллар нархлари сезиларли даражада пасайган бўлса, кам фойдаланилган автомобиль нархларида сезиларли ўзгариш кузатилмади. Хусусан, август ойида кам фойдаланилган Lacetti автомобилининг иккиламчи бозордаги нархи 4,5 фоизга, ўртача фойдаланилгани 6,0 фоизга ва кўп фойдаланилгани 5,4 фоизга ошди. Сентябрь ойида эса ўртача ва кўп фойдаланилган Lacetti нархлари август ойига нисбатан мос равишда 2,1 ва 2,8 фоизга ҳамда кам фойдаланилган Lacetti нархлари 0,8 фоизга пасайди.

Маҳаллий оммабоп автомобиль учун сентябрь ойида таклиф қилинган ўртача нархлар қуйидагиларни ташкил қилди:

• Lacetti: кам фойдаланилган — 15 091 доллар (август ойида — 15210 доллар), ўртача фойдаланилган — 14 341 доллар (14 649 доллар), кўп фойдаланилган — 13 044 доллар (13 420 доллар);
• Cobalt: кам фойдаланилган — 13 040 доллар (август ойида — 13 189 доллар), ўртача фойдаланилган — 12 301 доллар (12 769 доллар), кўп фойдаланилган — 11 488 доллар (11 904 доллар);
• Spark: ўртача фойдаланилган — 10 078 доллар (август ойида — 10 390 доллар), кўп фойдаланилган — 8 818 доллар (9 149 доллар).

Маҳаллий люкс автомобиллар (Malibu, Tracker) нархлари

Август ойида кам фойдаланилган Malibu учун таклиф этилган ўртача нарх июль ойига нисбатан 2,8 фоизга, ўртача фойдаланилганлари учун 3,8 фоизга, кўп фойдаланилганлари учун 2,0 фоизга ошган бўлса, сентябрь ойида кам фойдаланилган Malibu учун таклиф этилган ўртача нарх август ойига нисбатан 2,8 фоизга, ўртача фойдаланилганлар учун 1,5 фоизга, кўп фойдаланилганлар учун 0,4 фоизга пасайди.

Маҳаллий люкс автомобиллар учун сентябрь ойида таклиф қилинган ўртача нархлар қуйидагича:

• Malibu: кам фойдаланилган — 29 390 доллар (август ойида — 30 252 доллар), ўртача фойдаланилган — 28 703 доллар (29 154 доллар), кўп фойдаланилган — 24 401 доллар (24 506 доллар);
• Tracker: кам фойдаланилган — 18 500 доллар (август ойида — 19 284 доллар), ўртача фойдаланилган —17 738 (18 723 доллар), кўп фойдаланилган — 16 647 доллар (16 956 доллар).

Random Forest модели: автомобиль нархларига таъсир этувчи омиллар. Оқ рангли Lacetti ва Cobalt’нинг босиб ўтган масофаси уларнинг нархларига юқори даражада таъсир этган бўлса, Damas’нинг ишлаб чиқарилган йили нархни белгилашда асосий омил бўлди. Шунингдек, Lacetti нархига унинг қора рангли эканлиги энг кўп таъсир этиши аниқланди.

Автомобиллар босиб ўтган масофаси ҳамда ишлаб чиқарилган йилига кўра қуйидаги гуруҳларга ажратиб олинди:

• 2023—2024 йилларда ишлаб чиқарилган ҳамда босиб ўтган масофаси 20 000 километргача бўлган автомобиллар – “кам фойдаланилган”;
• 2023—2024 йилларда ишлаб чиқарилган ҳамда босиб ўтган масофаси 20 000 километрдан 50 000 километргача бўлган автомобиллар, шунингдек, 2021—2022 йилларда ишлаб чиқарилган ҳамда босиб ўтган масофаси 40 000 км гача бўлган автомобиллар — “ўртача фойдаланилган”;
• 2023—2024 йилларда ишлаб чиқарилган ва босиб ўтган масофаси 50 000 километрдан кўп бўлган автомобиллар, 2021-2022 йилларда ишлаб чиқарилган ҳамда 40 000 километрдан ортиқ масофани босиб ўтган автомобиллар ҳамда 2020 йилда ишлаб чиқарилган барча автомобиллар – “кўп фойдаланилган”.

Маълум қилинишича, автомобиль нархларини таҳлил қилишда маълумотлар olx.uz платформасидан веб скрепинг (web scraping) орқали тўпланди. Бунда 2020—2024 йилларда ишлаб чиқарилган автомобиллар учун таклиф этилаётган нархлар саралаб олингандан сўнг, 30,5 мингта маълумотлар асосида таклиф этилаётган нархлар таҳлил қилинди. Шунингдек, автомобиль нархларига таъсир этувчи омиллар Random Forest модели ёрдамида аниқланди.

Аввалроқ аудит, солиқ, юридик ва маслаҳат хизматларини кўрсатувчи дунёдаги фирмалар тармоқларидан бири бўлган KPMG тадқиқоти натижалари эълон қилинганди. Унга кўра, Ўзбекистонда ҳар мингта аҳолига тўғри келадиган автомобиллар сони қўшни давлатларга қараганда анча паст. Ўзбекистон бозорида автомобиллар сонининг ўсишига ҳисса қўшган асосий омиллардан бири бу автокредитлардир. Шунингдек, лизинг ва бўлиб тўлаш каби омиллар яқин келажакда автомобиль савдоси ўсишига сезиларли таъсир кўрсатишда давом этади.