Теледебатлар партиялар ўртасидаги очиқ ва эркин сиёсий рақобатни кўрсатиб бермоқда

Куни кеча сайловолди ташвиқотлари доирасида бўлиб ўтган теледебатда сиёсий партияларнинг ўзаро муросасиз муносабатларига гувоҳ бўлдик. Партия спикерлари ўртасидаги савол-жавобларда ўзаро таклифларга қўшилмаслик ва уларнинг танқидли қабул қилиниши кузатилди. Бир томондан, партиялар ўз ғояларини илгари сурган бўлса, бошқа томондан ушбу таклифларни асослантириб беришга мажбур бўлдилар.

Айниқса, дебатларнинг учинчи раунди жиддий мунозараларга айланиб кетди. Бу раундда коррупция, таълим, солиқ сиёсати каби масалалар муҳокама қилинди. “Адолат” социал-демократик партиясининг коррупцияга қарши курашишга оид таклифи Экологик партиянинг танқидига сабаб бўлди. Бунга жавобан “Адолат” вакили коррупцияга қарши курашиш партиянинг эмас, барчанинг вазифаси эканлигини таъкидлади. Шунингдек, “Адолат” СДП Коррупцияга қарши курашиш агентлиги мақоми ва ваколатларини кучайтириш, коррупциявий ҳолатларга чек қўйиш тарафдори эканлиги маълум қилинди.

Таълим мавзусидаги баҳс-мунозаралар ҳам қизғин тус олди. Жумладан, “Миллий тикланиш” демократик партиясининг 7-синфдан бошлаб мактаб ўқувчиларини қобилиятига қараб ўқитиш таклифи “Адолат” партияси вакилларини хавотирга солди. “Миллий тикланиш” вакили эса амалдаги тизимда боланинг хоҳишлари ва қизиқишлари эътиборга олинмаслиги адолатсизлик эканини қайд этди.

Солиқ масаласида ҳам қарашларда ўзаро зиддият кузатилди. ЎзЛиДеП вакили ХДПнинг ортиқча ҳашамат учун адолатли солиқ солиш тизимини жорий этиш таклифини танқид қилиб, бу таклиф иқтисодиётга акс таъсир этиши, мулкдорларнинг манфаатларини чеклаши мумкинлигини таъкидлади. Бунга жавобан ХДП вакили партия мулкдорларга қарши эмаслигини, аксинча, бу таклиф орқали ижтимоий тенгсизликнинг олди олиниб, ижтимоий лойиҳалар амалга оширилишини маълум қилди. Бу баҳс солиқ сиёсати ҳам иқтисодий, ҳам ижтимоий аҳамиятга эга эканлигидан далолат беради.

Дебатларда гувоҳ бўлганимиздек, сиёсий партилар муҳокама қилинган соҳалардаги мавжуд муаммоларни чуқур англаш билан бир қаторда, уларни ҳал қилиш юзасидан ўзига хос ва аниқ ёндашувларига эга эканликларини намоён этмоқдалар.