Жиноят ишлари бўйича Самарқанд шаҳар судида ўзганинг мулкини ноқонуний тарзда фирибгарлик йўли билан ўзлаштирган самарқандлик «Аҳмадбой»нинг жиноят иши кўриб чиқилди. Бу ҳақда «Дарё» мухбири Фарҳод Норбўтаев хабар бермоқда.
Суд жараёнида маълум бўлишича, судланувчи Рамеш Муртазаев 2014 йилнинг февраль ойида Камол Эгамқуловга тегишли бўлган Жиззах вилояти Ғаллаорол туманида жойлашган «Янги аср» газ қуйиш шохобчасини сотиб олиш учун 60 минг АҚШ доллари беришини айтиб, 42 000 АҚШ доллари бериб ушбу шохобчани ўзининг номига расмийлаштириб олган. Қолган 18 минг АҚШ доллар пулларини эса ўз эҳтиёжларига учун сарфлаб юборган.
Рамеш Муртазаев ўзининг жиноий ҳаракатларини давом эттириб, 2016 йилнинг октябрь ойида таниши Фаёз Жўраевдан Spark русумли транспорт воситаси учун 6 000 АҚШ доллари пул беришини айтиб, автомашинани фирибгарлик йўли билан қўлга киритиб, уни бошқа одамга сотиб юборган.
2016 йилнинг ноябрь ойи охирларида таниши Фарруҳ Хуррамовнинг ишончига кириш учун 2016 йил октябрь ойида бошқа бировга сотиб юборган Volvo русумли экскаваторини ўзига тегишли эканлигини билдириб, экскаваторни 200 000 000 сўм эвазига уни номига расмийлаштириб беришлигини ваъда қилиб, алдов йўли билан 7500 АҚШ доллари пул маблағларини фирибгарлик йўли билан қўлга киритади. Ваъда қилинган Volvo русумли экскаваторини унинг номига расмийлаштириб бермасдан, пул маблағларини ўзининг эҳтиёжларига ишлатиб юборган.
Рамеш Муртазаев ўзининг навбатдаги «тузоғи»ни 2016 йил декабрь ойида Самарқанд шаҳрида яшовчи таниши Армен Арустамовга қўяди. У Армен Арустамовнинг Nexia-2 русумли автомашинаси учун 6 500 АҚШ доллари пул беришини айтиб, автомашинани фирибгарлик йўли билан қўлга киритиб, уни бошқа одамга сотиб юборади.
Ўзгалар мулкини осонлик билан қўлга киритиб, фирибгарлик йўли билан мўмай пул топаётган Рамеш Муртазаев 2017 йилнинг январь ойида таниши Камол Эгамқуловнинг таъсисчилигида очилган «Боғдон Газ Сервис» МЧЖнинг директори сифатида иш бошлайди. Ўз мансабидан фойдаланиб «Боғдон Газ Сервис» МЧЖ фаолиятини ривожлантириш мақсадида «Ипотека банк»нинг Кўксарой филиалидан корхонани қайта таъмирлаш ва ривожлантириш мақсадида Ипотека кредити тариқасида ташкилот ҳисоб рақамига 450 000 000 сўм пулни ўтказдиради. Бироқ, Рамеш Муртазаев МЧЖни таъмирлаш ва ривожлантиришга йўналтирган кредит маблағларининг 100 000 000 сўмини «Сала-Бала» КТИЧФнинг ҳисоб рақамига қурилиш моллари олиш учун ўтказиб, 350 000 000 сўмини «Эвеллина Строй Сервис» МЧЖнинг ҳисоб рақамига бажарилган ишлар учун ўтказиб, шундан 144 000 000 сўмни Камол Эгамқуловнинг номига «Ипотека банк» Кўксарой филиалидан очилган пластик картага ўтказиб, ўзининг эҳтиёжлари учун ишлатиб юборганлиги аниқланди.
Бу ҳам етмаганидек, 2017 йилнинг январь ойида «Боғдон Газ Сервис» МЧЖнинг ҳисобида бўлган умумий қиймати 14 700 000 сўмга тенг бўлган икки дона газ сақлаш сиғимининг газ қувурлари, газни тўкиш компрессори ва газ ўлчов колонкасини дастлабки тергов давомида аниқлашнинг имкони бўлмаган шахсларга сотиб юборган.
Ўз ишининг «устаси»га айланиб қолган Рамеш Муртазаев 2017 йилнинг март ойида Самарқанд шаҳрида яшовчи таниши Сирожиддин Турсуновдан Lacetti (Gentra-2) русумли автомашинаси учун 14 500 АҚШ доллари пул беришини айтиб, автомашинани фирибгарлик йўли билан қўлга киритиб, уни ҳам бошқа одамга сотиб юборади. Орадан ҳеч қанча вақт ўтмасдан, таниши Аброр Жабборовдан тез кунда қайтариб беришини вада қилиб 22 000 АҚШ доллари миқдоридаги пулларини фирибгарлик йўли билан қўлга киритиб, ўз эҳтиёжлари учун ишлатиб юборади.
2017 йилнинг апрель ойида эса таниши Илҳом Исмоиловдан вақтинча фойдаланиб туриши учун бир дона баҳоси 180 000 000 сўмлик Samsung русумли ковшли экскаваторни ҳам фирибгарлик йўли билан қўлга киритиб, уни ҳам бошқа шахсларга сотиб юборган.
«Ўзига хон, кўланкаси майдон» бўлган Рамеш Муртазаев 2017 йилнинг май ойида таниши Аҳрор Каримовга газ шохобчаси учун ёқилғи олиб келиб беришини айтиб, 134 000 000 сўм, Оқдарё тумани ҳокимиятида ишловчи танишларининг ёрдами билан Оқдарё тумани ҳудудидан 40 сотих ер олиб беришини айтиб, 2000 АҚШ доллари пулларини фирибгарлик йўли билан қўлга киритиб, ушбу маблағларни ҳам ўзининг эҳтиёжлари учун сарфлаб юборади.
Бу ҳам етмаганидек, 2017 йилнинг 5 май куни Аҳрор Каримовнинг АТБ «Халқ банки» Боғишамол филиалига 50 000 000 сўм миқдорида омонат пули қўйганлигини билган ҳолда, ушбу пул маблағини қўлга киритиш мақсадида Аҳрор Каримовнинг номидан ушбу пул маблағини ўзи раҳбарлик қилган «Янги Аср-1» хусусий корхонасининг ҳисоб рақамига ўтказиш сўралган аризани сохталаштириб, АТБ «Халқ банки» Боғишамол филиали бухгалтер-назоратчи Д.Обидовага тақдим қилган ҳолда Аҳрор Каримовнинг ҳисобида бўлган 50 000 000 сўм миқдордаги омонат пулларини «Янги аср-1» ХК ҳисоб рақамига ўтказиб юборади. Қўлга киритилган пулларни эса ўзининг эҳтиёжлари учун сарфлаб юборади.
Суд жараёнида 2017 йилниг май ойида Рамеш Муртазаев таниши Илҳом Бадаловга онаси шифохонада эканлигини, онасини даволатиш учун ва автомобилларга ёқилғи қуйиш шохобчаси ташкил қилиш учун пул кераклигини айтиб, 160 000 000 сўм пулларини фирибгарлик йўли билан қўлга киритганлиги аниқланди.
Ўзгаларни чув туширишни касбга айлантириб олган Рамеш Муртазаев 2017 йилниг май ойида таниши Сайфулло Маҳмудовдан тез кунда қайтариб бериш шарти билан 4 700 АҚШ доллари пулларини қўлга киритади. 2017 йилнинг май ойида Оқдарё тумани Қум кишлоғида яшовчи таниши Баҳриддин Абдуллаевдан эса тез кунда қайтариб бериш шарти билан 13 000 АҚШ доллари пулларини олиб бу пулларни ҳам ўз эҳтиёжлари учун сарфлаб юборади.
«Сутдан оғзи куйган қатиқни ҳам пуфлаб ичади», деган нақл бор. Рамеш Муртазаевнинг фирибгарлигидан бир бора куйган Камол Эгамқуловдан иккинчи бор унинг алдовига ишонади. 2017 йилнинг июнь ойида Жиззах вилояти Ғаллаорол туманида Камол Эгамқуловдан Ғаллаорол туманида жойлашган «Янги аср» газ қуйиш шохобчасини ишга тушириш учун 180 000 000 сўм пулларини тез кунда қайтариш шарти билан қўлга киритиб, ушбу пулларни ўзининг эҳтиёжларига учун сарфлаб юборади.
Бундан ташқари, Рамеш Муртазаев 2017 йилнинг июль ойида таниши Сухроб Саидовнинг таъсисчилигида очилган «Минбар Самарқанд» МЧЖда директор лавозимида ишлаб келиши давомида МЧЖ фаолиятини ривожлантириш мақсадида суюлтирилган газ олиш учун «Агро банк»нинг Жомбой тумани филиалидан «Минбар Самарқанд» МЧЖнинг ҳисоб рақамига 300 000 000 сўм пулларни ипотека кредити тариқасида олиб, ушбу кредит маблағларини МЧЖ фаолиятини ривожлантиришга йўналтирмасдан, ўз манфаатлари учун ишлатиб юборганлиги аниқланди.
Боз устига Р. Муртазаев 2017 йилнинг июль ойида «Минбар Самарқанд» МЧЖ ҳисобида бўлган икки дона баҳоси 117 384 580 сўмлик Lacetti русумли транспорт воситалари ва бир дона баҳоси 97 183 000 сўмлик Cobalt русумли автомашиналарни бошқа одамларга сотиб, пулларини ўзининг эҳтиёжлари учун ишлатиб юборган.
Жиноят ишлари бўйича Самарқанд шаҳар судида судья Ғ.Негматов раислида ўтказилган суд жараёнида томонларнинг фикрлари тўлиқ ўрганилиб, ушбу жиноий иш юзасидан суд ҳукми эълон қилинди. Суд ҳукмига кўра Рамеш Муртазаев Ўзбекистон Республикаси ЖКнинг 167-моддаси 3-қисми «а» банди, 168-моддаси 4-қисми «а» банди, 28,211-моддаси 1-қисми, 228-моддаси 1-қисми ва 228-моддаси 3-қисмида назарда тутилган жиноятларни содир этганликда айбли деб топилиб 8 йил муддатга озодликдан маҳрум қилиш жазоси тайинланди.
Рамеш Муртазаевдан давлат фойдасига 16 376 660 сўм, жабрланувчи Камол Эгамқулов фойдасига жами 327 389 940 сўм, жабрланувчи Жўраев Фаёз фойдасига 45 035 815 сўм, «Боғдод Газ Сервис» МЧЖ ҳисобига жами 464 700 000 сўм, жабрланувчи Аброр Жабоаров фойдасига 180 143 260 сўм, жабрланувчи Сирожиддин Турсунов фойдасига 118 730 785 сўм, жабрланувчи Илҳом Исмоилов фойдасига 180 000 000 сўм, жабрланувчи Илҳом Бадалов фойдасига 160 000 000 сўм, жабрланувчи Сайфулло Маҳмудов фойдасига 38 485 151 сўм, жабрланувчи Баҳриддин Абдуллаев фойдасига 106 448 290 сўм, «Минбар Самарқанд» МЧЖ фойдасига 307 000 000 сўмлик моддий зарар ундирилиш тўғрисида ҳукм чиқарилди.
Изоҳ (0)