Испаниянинг GQ нашрига берган янги интервьюсида хонанда Шакира “Барселона” нинг собиқ футболчиси Жерар Пике билан ажрашгандан кейинги ҳаёти ва нималарни ҳис қилаётгани ҳақида сўзлаб берди.
Интервьюда колумбиялик хонанда бундай катта йўқотиш ва дардни енгишга айнан мусиқа ва қўшиқ куйлаш ёрдам берганини таъкидлади.
“Ажримдан кейин бир неча ой давомида мен қайғуларимни ичимга ютишга ҳаракат қилиб жим қолдим. Аммо мусиқа ёзишни бошлагач, қайғуларни енга бошладим. Айнан санъатга қайтиш менинг даволаниш усулимга айланди. Бу бир текисда давом этмаган бўлса ҳам менга анча енгиллик берди”, дея ўз кечинмалари ҳақида сўзлаб берди Шакира.
Шунингдек, хонанда ўзининг ота-онасига ҳавас қилиши ва улар билан фахрланишини таъкидлади:
“Ота-онам муносабатлари чин севгининг ҳақиқий намунасидир. Уларнинг севгиси ҳар қандай тўсиқларни енгиб ўтади. Ота-онам 50 йилдан бери бирга. Мен онамнинг отамга гўё бу дунёда қолган охирги одамга қарагандек тикилишини кўраман. Отам ҳам онамга худди шундай жавоб беради. Улар кекса бўлишига қарамай, ёш жуфтликлардек хушчақчақ ва бахтиёр ҳаёт кечиради”, дея бўлишди хонанда.
Ажримдан сўнг бўлиб ўтган воқеалар, жумладан, суд ишлари қийинчиликларига қарамай, Шакира ушбу оғир даврда уни яқинлари қўллаб-қувватлаганини айтди. “Менимча, бу дунёда севги бор, лекин фақат айрим инсонларгагина насиб этади, бу худди VIP клубнинг бир турига ўхшайди, унга ҳар ким ҳам кира олмайди”, дейди Шакира.
Эслатиб ўтамиз, Шакира ва Жерар Пике 2010 йилги футбол бўйича жаҳон чемпионати вақтида танишган. Собиқ севишганлар бир кунда, 10 йил фарқ билан туғилган. 11 йиллик муносабатлардан кейин Пике ва Шакиранинг ажрашгани 2022 йил июнда маълум бўлди. Ажримга футболчининг кўплаб хиёнати сабаб бўлгани хабар қилинган. Фарзандлари Саша ва Милан туғилганига қарамай, жуфтлик оилавий муносабатларини қонунийлаштирмаган ва фуқаролик никоҳида яшаган. Ажримдан сўнг хонанда болаларнинг васийлигини ўз зиммасига олган.
Изоҳ (0)