Тошкент вилояти ҳокими Зоир Мирзаев Олий Мажлис сенати аъзолигига сайланди. Бу ҳақда «Дарё»га ҳокимлик ахборот хизмати маълумот берди.
Қайд этилишича, бугун Олмалиқ шаҳридаги «Металлург» маданият саройида вилоятда бўшаб қолган ўринга Ўзбекистон Республикаси Олий Мажлиси Сенати аъзоси сайловини ўтказиш бўйича қўшма мажлис бўлиб ўтган.
Мажлисда Марказий Сайлов комиссияси раиси Зайниддин Низомхўжаев сўз олиб, номзодни сайлаш тўғрисида йиғилганларга атрофлича маълумот берди. Сайлов кодексига кўра, мажлисга раис этиб Халқ депутатлари вилоят кенгаши депутати Фарҳодбек Умаров сайлаб олинди. Шундан сўнг мажлис регламенти, мажлис котибияти, қўшма мажлис ишини юритиш бўйича ҳайъат аъзолари, Маслаҳатлашув кенгаши, саноқ комиссияси аъзолиги номзодлари овозга қўйилди ҳамда депутатлар томонидан тасдиқланди, — дейилади ҳокимлик ахборотида.
Саноқ комиссияси хулосасига кўра, қўшма мажлисда 643 нафар депутат иштирок этиб, овоз бериш жараёнларида уларнинг барчаси қатнашган.
Қўшимча қилинишича, қўшма мажлисда депутатларнинг 641 нафари Зоир Мирзаев номзодини ёқлаб овоз берган. Ва Зоир Мирзаев кўпчилик овоз билан Олий Мажлис Сенати аъзоси этиб сайланган.
Аввалроқ Зоир Мирзаев фуқаролар учун қабулида ҳоким қабулига келиб бақир-чақир қилаётган, шунингдек қабулга халал бераётганларга мурожаат қилиб, ҳокимларни ёмон кўрувчиларнинг фарзанди ҳам ҳоким бўлсин дегани хабар берилганди.
Изоҳ (0)