АҚШнинг S+N Associates Ins. компанияси Тошкент вилоятининг Нурафшон шаҳрида 1600 гектар ер майдонида “Ақлли шаҳар” технологияси асосида шаҳар барпо этиш бўйича ўз лойиҳаларини тақдим этди. Бу ҳақда Тошкент вилояти ҳокимлиги маълум қилди.
Хабарда айтилишича, вилоят ҳокими Зоир Мирзаев АҚШнинг S+N Associates Ins. компанияси директори Роналд Джеймс Хаббард бошчилигидаги делегацияни қабул қилган.
40 йилдан зиёд вақт мобайнида дунёнинг нуфузли давлатларида янги аэропорт, меҳмонхоналар, университет, сотув ва хизмат кўрсатиш объектлари, шунингдек, янги шаҳарлар қуриш ишлари билан шуғулланиб келаётган мазкур йирик компания Нурафшонда 1600 гектар ер майдонида “Ақлли шаҳар” технологияси асосида шаҳар барпо этиш бўйича ўз лойиҳаларини тақдим этди.
10-15 миллиард долларлик мазкур лойиҳага қўшимча 15 дан ортиқ йирик инвесторлар жалб қилиниши, дастлаб, маҳаллий маҳсулотлардан арзон ва сифатли қурилиш материаллари ишлаб чиқариладиган завод ташкил этиш таклифлари муҳокама қилинди, дейилади ҳокимлик ахборотида.
Қўшимча қилинишича, “Ақлли шаҳар”да давлат корхонаси ва ташкилотлари, тиббиёт, таълим муассасалари жой олади. Шунингдек, саноат зоналари, технопарклар жойлаштирилади.
S+N Associates Ins. компанияси шубҳалими?
Блогер Никита Макаренконинг ёзишича S+N Associates Ins. Компаниясининг сайти 2015 йилдан буён янгиланмаган. Компания илгари амалга оширган лойиҳалар назар солинса, болалар майдончаси, асфалт ётқизиш ва йўл қуриш билан шуғуллангани кўринади.
Қизиқ жиҳати компания сайтида 3,5 миллион доллардан ортиқ лойиҳаларни ишлаб чиқишга қодир эмаслиги тўғрисида ёзилган. Аммо улар Нурафшонда 10-15 миллиард долларлик лойиҳани амалга оширмоқчи.
Ҳолат юзасидан масъуллардан изоҳ кутамиз.
Изоҳ (0)