Қарши туман ҳокими Мақсуда Мустафоева ҳайфсан олди

Қашқадарё вилоятининг Қарши туманига раҳбарлик қилиб келаётган, вилоятдаги ягона аёл ҳоким — Мақсуда Мустафоева жазоланди. Бу ҳақдаги ҳужжатни «Дарё»га тақдим қилган Зоир Мирзаевнинг матбуот котиби Аҳрор Содиқов ҳоким Мустафоева учта қўпол хатога йўл қўйганини ошкор қилди.

Таъкидланишича, туман ҳокимининг жазоланишига 2021 йилнинг 23 июлида ўтказилган йиғилишдаги танқидий фикрлар ва хулосалар сабаб бўлган.

Қайд этилишича, 2021 йилнинг 23 июль куни вилоятда бўлиб ўтган йиғилишда вилоят аҳолисидан келиб тушаётган мурожаатларнинг ижроси ва Ўзбекистон Республикаси Президенти сайловига тайёргарлик кўриш ишлари бўйича йўл қўйилган хато-камчиликлар муҳокама қилинган. Ва мазкур йиғинда Мақсуда Мустафоеванинг учта хатоси — Президент қабулхонаси ва Виртуал қабулхоналарга Қарши тумани аҳолисидан келиб тушган мурожаатлар 2020 йилнинг мос даврига нисбатан 67 фоизга кўпайганлиги; 18 та сайлов участкаси мутлақо талабга жавоб бермаётганлиги; ҳоким ва сектор раҳбарлари жойига чиқиб, оғир ҳудуддаги участкалар билан қизиқмагани, у ерга умуман бормагани, ишларни ташкил этишда бефарқ бўлганлиги санаб ўтилган. Йиғилишдаги мазкур хулосалар сабаб Зоир Мирзаев 2021 йил 12 август куни қарор қабул қилиб, Қарши тумани ҳокими Мақсуда Мустафоевага нисбатан Меҳнат кодексининг 181-моддасининг 1-қисмига асосан ҳайфсан интизомий жазосини тайинлашни лозим топган.

Эслатиб ўтамиз, Қашқадарёнинг ягона аёл ҳокими Мақсуда Мустафоева интернетда вилоятда фаолият юритган энг йирик пахтачилик кластери Sulton tex group корхонаси раҳбарини селекторларга келмаслик, телефон қўнғироқларига жавоб бермаслик, шунингдек, туман аҳолиси учун боғча ва мактаб қуриб бермасликда айблаш билан танилган. Мустафоева хоним кейинчалик тумандаги 5 нафар аёлга хайрия қилинган 100 миллион сўм пулни улардан уй қуриб бериш баҳонасида олиб, қайтариб бермагани сабаб ҳам жамоатчилик эътиборига тушган. Қайд этиш лозим, 100 миллион сўм можароси оммага ошкор бўлгач, ҳоким уч нафар аёлга 60 миллион сўмни қайтариб беришни ваъда қилса-да, ҳалигача ваъдасининг устидан чиқмаган.