Киевга 14 май куни ташриф буюрган АҚШ давлат котиби Энтони Блинкен Украинада президентлик сайловларини ўтказиш шарти ҳақида гапирди.
Блинкеннинг таъкидлашича, Украинада янги сайловлар мамлакат аҳолисининг хоҳиш-иродасидан келиб чиқиб амалга оширилади.
Шунинг учун биз ҳукумат ва фуқаролик жамияти гуруҳлари билан Украинанинг сайлов инфратузилмасини мустаҳкамлаш устида ишламоқдамиз. Украиналиклар шартларни маъқулласа, барча Украина фуқаролари, шу жумладан, кўчирилганлар ҳам овоз бериш ҳуқуқидан фойдаланиши мумкин бўлади, — деди у Киев политехника институтида сўзлаган нутқида.
АҚШ давлат котиби шартлар деганда айнан нимани назарда тутаётганига ойдинлик киритилмаган. Украинада уруш пайтида ўтказиб бўлмайдиган парламент ва президентлик сайловлари туфайли ҳокимиятнинг қонунийлиги масаласи фаол муҳокама қилинмоқда.
2023 йил август ойида Владимир Зеленский агар уруш даврида сайловлар ўтказилса, янги президентлик муддатига ўз номзодини қўйишга тайёрлигини айтган. Октябрь ойида Украинада амалдаги ҳарбий ҳолат туфайли Олий Радага сайловлар ўтказилмаган. Ноябрь ойи бошида эса Зеленский “ҳозир сайлов вақти эмас”лигини таъкидлаган.
9 май куни Зеленский Украинада ҳарбий ҳолат ва сафарбарликни яна 90 кунга узайтирувчи қонунларни имзолади. Украинада ҳарбий ҳолат ва сафарбарлик 2022 йил 24 февралда жорий этилган. Мамлакатда президентлик сайлови 2024 йил март ойида ўтказилиши режалаштирилган эди.
Изоҳ (0)