Жорий йил бўлиб ўтадиган сайловлар, бир жиҳати билан ҳар йилги сайловлардан фарқ қилаётганини кузатиш мумкин. Ушбу сайловларда партиялар телевидение ва ижтимоий тармоқларда анча фаол кўринмоқда, ҳар куни ОАВда партияларнинг Сайловолди дастуридаги муҳим ташаббуслари, сайловчилар билан учрашувлари, ташвиқот тадбирлари хусусида қандайдир янгиликка кўзимиз тушмоқда.
Айниқса, Халқаро пресс клубда сиёсий партия лидерлари иштирокида янги форматда ташкил этилган теледебатлар кўпчиликда қизиқиш уйғотмоқда. Уни кузатиб, мамлакатимизда ҳам сиёсий партиялар ўртасида рақобат муҳити кучаётганини ҳис қилиш мумкин.
Айниқса, партия раҳбарларининг сайловчилар олдида ўз Сайловолди дастурида илгари сураётган муҳим ташаббуслари бўйича тақдимоти, фуқароларимизни қийнаб келаётган оғриқли муаммолар бўйича берилган саволлар ва партиянинг ушбу муаммолар ечими бўйича позицияси ҳақидаги фикрлари, ривожланган мамлакатлардаги парламент сайловлари чоғида кўриб, кузатиб, ўрганиб қолган ҳақиқий рақобат муҳитини эслатиб юборди.
Яна бир жиҳати, маълум масалаларда партиялар ўз ташаббусининг устун томонларини асослаб бераётгани кузатилмоқда. Бу сайловчиларнинг қизиқишини ҳам оширмоқда.
Менимча четдан туриб “партия жамиятда нима ўзгариш қилди” деб танқид қилгандан кўра “биз партия билан бирга жамиятда нимани ўзгартирамиз” деган қарашни шакллантириш вақти келибди.
Партиялар кимдан куч олади? Албатта биз сайловчилардан, халқимиздан.
Партиялар аллақачон ўз ўрнини топган, биз фуқаролар уйғонишимиз, сиёсий жараёнларда фаол бўлишимиз ва асосли таклифларимизни учрашувлар ва мулоқотлар давомида партияларга етказишимиз ҳамда ўз келажагимизни қуришга бефарқ бўлмаслигимиз керак!
Изоҳ (0)