Қирғизистонда коррупцияда айбланган божхона қўмитаси собиқ мансабдорининг акаси парламентда коррупцияга қарши курашиш қўмитаси раҳбарига ўринбосар бўлди

Қирғизистон божхона қўмитаси раисининг ўринбосари Райимбек Матраимовнинг (Райимбек-миллион) акаси Искандер Матраимов мамлакат Жуқорғи Кенешининг қонунчилик, жиноятчиликка ва коррупцияга қарши курашиш қўмитасининг раҳбарига ўринбосар бўлди. Бу ҳақда Қирғизистон парламенти матбуот хизмати хабар қилган.

Ундан ташқари раҳбар ўринбосарлари лавозимларига яна икки нафар депутат Русланбек Жакишев ва Бакит Тентишев сайланган. Сайланиш жараёни 13 январь куни Жуқорғи Кенешда яширин овоз бериш йўли билан амалга оширилди. Бир кун аввал депутатлар Жуқорғи Кенешнинг 8 асосий қўмиталарига раҳбарларни сайлаган ва параламент тузилмасини тасдиқлаганди.

Қирғизистонда Конституцион палатасининг собиқ судьяси, сиёсатчи Клара Сўронкулова «Вести.кг» нашрига ҳодиса юзасидан изоҳ берган вақтида Матраимов мазкур лавозимда ишлашдан воз кечиши кераклигини қайд этган.

«Республикада сиёсий маданият йўқ. Миллий кенгаш депутатлари жамоат тартиби, жиноятчиликва коррупцияга қарши кураш қўмитаси раис муовинларини сайлашда уларнинг қариндошчилик алоқаларини ҳисобга олиши зарур. Депутатнинг укаси «Коррупция» моддаси бўйича жавобгарликка тортилган. Искандер Матраимов ҳам виждонан иш тутиб, ушбу лавозимдан воз кечиши лозим эди. Аммо у бу ишни қилмади, халқ вакиллари эса унга ушбу масъулиятли лавозимни ишониб топширди. Кутамиз ва унинг коррупцияга қарши қандай курашишини кузатамиз», — деган сиёсатчи аёл.

Райимбек Матраимов 2021 йил 11 февралида «Коррупция» моддаси бўйича суд қилинган. Собиқ амалдор тергов билан келишиб, давлат фойдасига 2 миллиард қирғиз сўми (24 миллион АҚШ доллари) миқдорида маблағ тўлагач, қамоқ жазосини қутилиб қолди (аслида мазкур модда санкцияси бўйича айбдор деб топилган мансабдор озодликдан маҳрум қилиниши керак). Суд Райимбекга 260 минг сўм (3 минг доллар) жарима жазосини тайинлади, бу жамоатчиликдан норозиликларни вужудга келтирди.

2021 йил охирида бўлиб ўтган парламент сайловларида Матраимовнинг акаси Искандер партиясиз, мустақил номзод сифатида қатнашди ва ўз сайлов округида ғалаба қозонди.

2020 йилдаги шов-шувли парламент сайловларида Искандер Матраимов «Мекеним Қирғизистон» партиясидан номзодини қўйган, якунда партия сайловчиларнинг овозини сотиб олганликда айбланганди.