Сайловга тайёргарлик кўриш ва уни ўтказишда аёллар юқори фаоллик кўрсатди. «Дунё» ААнинг маълум қилишича Европада хавфсизлик ва ҳамкорлик ташкилоти Демократик институтлар ва инсон ҳуқуқлари бўйича бюроси тақдим этган дастлабки ҳисоботда шундай хулосага келди.
Миссия берган маълумотга кўра, округ сайлов комиссияларининг 266 нафар аъзосининг 39 фоизини аёллар ташкил этди, участка сайлов комиссияларида 54 фоиз аёллар қатнашган. Шу билан бирга, участка сайлов комиссияларининг 45 фоизида аёллар раислик қилган.
Ҳисоботда Ўзбекистонда аёлларнинг жамият ва давлат ишларини бошқаришдаги иштирокини таъминлаш масаласи давлат сиёсати даражасига кўтарилгани қайд этилган. Таъкидланишича, 2030 йилга қадар Ўзбекистонда гендер тенгликка эришиш стратегияси қабул қилинган ва амалга оширилмоқда. Унда ижтимоий-сиёсий жараёнларда аёлларнинг иштирокини таъминлаш, аёлларни раҳбарлик лавозимига тайинлаш амалиётини кенгайтириш муҳим йўналишлардан бири ҳисобланади.
«Амалга оширилган чора-тадбирлар натижасида Ўзбекистон тарихида илк маротаба парламентда хотин-қизлар сони БМТ томонидан белгиланган тавсияларга мос даражага етиб, парламентдаги хотин-қизлар сони қарийб 32 фоизга етди ва дунёдаги 190 та парламент орасида 37-ўринга кўтарилди. 5 йил олдин Ўзбекистон ушбу рейтингда 128-ўринни эгаллаган эди. Айни пайтда парламент Қуйи палатасидаги депутат хотин-қизлар сони жами депутатлар орасида 32 фоизни, Сенатда 25 фоизни ташкил этмоқда», — дейилади ҳужжатда.
Қайд этилганидек, Марказий сайлов комиссияси томонидан сайловнинг барча босқичларида аёллар иштирокидаги номутаносибликни бартараф этиш чора-тадбирлари кўрилди. Комиссия томонидан сайлов барча босқичларида аёллар ва эркакларнинг тенг иштирок этишини кузатишга қаратилган 11 та индикатор ишлаб чиқилди.
Улар Ўзбекистон президенти сайловини ўтказаётган округ сайлов комиссиялари аъзолари, участка сайлов комиссиялари аъзолари, сиёсий партияларнинг ваколатли вакиллари, Ўзбекистон президентлигига номзодларнинг ишончли вакиллари, сиёсий партиялар кузатувчилари, фуқароларнинг ўзини-ўзи бошқариш органлари кузатувчилари, аккредитациядан ўтган ОАВ вакиллари, республика бўйича мураббийлар, вилоятлар мураббийлари ва сайловчилар индикаторларидир.
Эслатиб ўтамиз, МСКнинг таклифига биноан, ЕХҲТ ДИИҲБ, ЕХҲТ Парламент ассамблеяси ва Европа парламентининг қўшма миссияси илк маротаба Ўзбекистондаги президент сайловини кузатди.
Ирландиялик дипломат Оуэн Мёрфи бошчилигидаги ЕХҲТ ДИИҲБ кузатувчилари 2021 йил 15 сентябридан буён сайловни кузатди. Миссия 17 кишидан иборат асосий гуруҳ, 28 нафар узоқ муддатли кузатувчи ҳамда ЕХҲТга аъзо 26 мамлакатдан ташриф буюрган 207 нафар қисқа муддатли кузатувчи сайлов куни овоз бериш жараёнини кузатди. Шу билан бирга, Президент сайловини кузатиш учун ЕХҲТ ДИИҲБ раҳбарияти, хусусан, бюро директори Маттео Мекаччи ҳам келди.
Бундан ташқари, 27 мамлакатдан 98 нафарга яқин депутат-кузатувчидан иборат ЕХҲТ Парламент ассамблеяси делегацияси ва ЕХҲТ ПА президенти Маргарета Седерфелт ва бош котиби Роберто Монтелла ҳам илк маротаба Ўзбекистон президенти сайловини кузатиш учун мамлакатга ташриф буюрди.
Шу билан бирга, 12 нафар депутатдан иборат Европа парламенти кузатувчилари ҳам ЕХҲТ ДИИҲБ миссиясига қўшилди. Ўзбекистонда бўлиб ўтган сайловларни кузатиш учун 44 мамлакатдан жами 365 та кузатувчи келди.
Экспертларнинг фикрича, Ўзбекистон президенти сайловида ЕХҲТ делегациясининг тўлиқ таркибда илк маротаба қатнашиши ташкилот томонидан мамлакатда амалга оширилаётган демократик ислоҳотларнинг эътироф этилиши ва қўллаб-қувватлашидан далолатдир.
Аввалроқ ЕХҲТнинг махсус координатори Рейнхолд Лопатка Ўзбекистондаги сайлов жараёнининг яхшиланганини қайд этганди. «Сизлар тўғри йўлдасизлар, лекин бу охирги қадам эмас, навбатдаги қадамларни ҳам қўйиш керак», — деган эди у.
Россия Федерал Кенгаши қўмитаси раиси ўринбосари Фарит Мухамецҳин Ўзбекистонда президент сайловлари халқаро стандартларга мос ўтказилганини таъкидлаган эди. Унинг фикрига кўра, номзодлар илгари сурган дастурлар умуман олганда «ўзбек халқининг кутилмаларига жавоб беради».
Изоҳ (0)