Шавкат Мирзиёев Ражаб Тоййиб Эрдўғонни умумхалқ сайловлари муваффақиятли ўтказилгани билан табриклади

Шавкат Мирзиёев 15 май куни Туркия президенти Ражаб Тоййиб Эрдўғон билан телефон орқали мулоқот қилди. Бу ҳақда Президент матбуот хизмати хабар берди.

Қайд этилишича, давлат раҳбари Туркия етакчисини мамлакатда президентлик ва парламент сайловлари муваффақиятли ўтказилгани билан самимий қутлаган. Уларнинг якунларига кўра, сайловчиларнинг кўпчилиги амалдаги президент ва республика альянсига овоз берган.

Овоз бериш натижалари қардош Туркия халқи президент Ражаб Тоййиб Эрдўғон раҳбарлигида амалга оширилаётган сиёсий янгиланишлар ва иқтисодий ислоҳотларни кенг қўллаб-қувватлаётганидан далолат экани алоҳида таъкидланган.

“Суҳбатда Ўзбекистон билан Туркия ўртасидаги кенг қамровли стратегик шериклик ва кўп қиррали ҳамкорлик муносабатларини янада мустаҳкамлашнинг долзарб масалалари кўриб чиқилди”, — дейилади хабарда.

Олий даражадаги Стратегик ҳамкорлик кенгашининг навбатдаги йиғилишида кун тартибини тайёрлаш бўйича фаол ишларни давом эттириш муҳимлиги қайд этилган.

TRT давлат телеканали маълумотларига кўра, Туркияда 100 фоиз бюллетенлар ҳисоблаб чиқилган. Унга кўра, Ражаб Тоййиб Эрдўғон 49,24 фоиз, Камол Қиличдарўғли эса 45 фоиз овоз тўплаган.