Сайловолди ташвиқотда ахлоқий меъёрлар: адолатли рақобат учун қадам

2024 йил 21 сентябрь куни сиёсий партиялар томонидан Марказий сайлов комиссияси билан ҳамкорликда ишлаб чиқилган сайловолди ташвиқотига оид одоб-ахлоқ қоидаларини партияларнинг раҳбарлари томонидан имзолаш маросими бўлиб ўтди.

Бундай келишувлар, аввало, сайлов жараёнида инсофли рақобатни таъминлаш ва ташвиқот жараёнида ўзаро ҳурмат, ижтимоий ахлоққа риоя этишни таъминлаш мақсадида амалга оширилди.

Ривожланган давлатларда одатда бундай битимлар сиёсий партиялар ёки номзодлар ўртасида сайлов жараёнида инсофсиз рақобатни олдини олиш, адолатли курашни таъминлаш, сайловчини алдамаслик ва эркин танловига шароит яратилш мақсадида тузилади.

Қоидалар сайловолди ташвиқоти даврида ёлғон ахборот тарқатишнинг олдини олиш, сайловчиларга босим ўтказмаслик ва сиёсий партиялар ўртасидаги ахлоқий қоидаларга риоя қилишни талаб қилади.

Бу, ўз навбатида, сайловчиларнинг эркин танловини ҳимоя қилиш ва уларга тўғри маълумот етказиш имконини яратади.

Партиялар томонидан имзоланган келишув Ўзбекистоннинг сайлов маданиятининг ривожига қўшилган муҳим қадам бўлиб, бу жараёнда сунъий интеллектдан фойдаланишда ҳам юқори ахлоқий стандартлар белгиланди.

Шунингдек, ҳар қандай бошқа манбалар орқали маълумотларнинг ҳаққонийлигини таъминлаш талаб этилади.

Ушбу қоидалар Ўзбекистонда сайловларнинг қонуний ва ошкора ўтишини таъминлаб, халқнинг сайлов жараёнига бўлган ишончини оширади. 

Партиялар ўз фаолиятларида ахлоқий меъёрларга риоя қилишлари орқали сайловчиларнинг ҳурматини қозонишга интилмоқдалар.

МСКга кўра, имзо варақаларини биринчи ЎзЛиДеП, сўнг “Миллий тикланиш” партияси топширган. Шундай қилиб, сайлов бюллетенида партиялар кетма-кетлиги қуйидагича бўлади:

• Ўзбекистон Либерал демократик партияси
• “Миллий тикланиш” демократик партияси
• Ўзбекистон Экологик партияси
• Ўзбекистон Халқ демократик партияси
• Ўзбекистон “Адолат” социал-демократик партияси

Маълумот учун, Ўзбекистонда парламент сайловлари 27 октябрда ўтказилади.