Қирғизистонда 28 ноябрь куни бўлиб ўтган парламент сайловлари вақтида «Ордо» партияси етакчиси Мирбек Мияров бедарак йўқолди. У сайловда овоз берганидан кейин ғойиб бўлган. Мияровни қидириш ишлари деярли икки сутка давом этди. 30 ноябрь куни унинг ўзи алоқага чиқди ва тоғда кўнгилсизликка учраганини маълум қилди, деб ёзади 24.kg.
28 ноябрь куни кечқурун Мияровни қидиришга милиция ходимлари ҳам жалб қилинган, улар сиёсий партия офисига келиб, партия аъзоларидан тушунтириш хати олган. Милиция Мияровнинг уйига ҳам ташриф буюрган ва оиласидан унинг бедарак йўқолгани ҳақида билдириш олган.
Партия сиёсий кенгаши аъзоси Мирлан Мамитовнинг сўзларига кўра, у Мияровни охирги марта 28 ноябрь куни соат 15.00 (Тошкент вақти билан 16.00) атрофида кўрган. Мияров Бишкекда 44-мактабдаги ўз сайлов участкасига овоз бериш учун борган ва шундан кейин ундан ҳеч қандай дарак бўлмаган. Мияровнинг қўл телефони ўчирилган, қариндошлари ва дўстларидан ҳеч ким унинг қаерда бўлиши мумкинлигини билмасди. Аввалроқ партия аъзолари ўз раҳбарини Миллий хавфсизлик давлат қўмитаси (ГКНБ) ходимлари ҳибсга олган бўлиши мумкинлигини тахмин қилган, бироқ қўмита буни рад этган.
«Ўша куни у овоз берди, мен жараённи суратга олдим ва у суратни чоп этишни сўради. Кейин у машинасига миниб, жўнаб кетди. Унинг ғойиб бўлиши учун ҳеч қандай сабаб йўқ эди. У ёлғиз эди, унга ҳамроҳлик қиладиган тансоқчилар бўлмаган. Бизда турли хил версиялар бор, аммо ҳеч бири асосли эмас. У уюшган жиноий гуруҳ аъзолари билан алоқага чиқмаган, шунинг учун уни ўғирлаб кетган бўлишлари мумкин деб айта олмаймиз. Миллий хавфсизлик давлат қўмитаси ҳам унинг ҳибсга олинганини рад этди. Ундан олдин ГКНБ уни сўроққа олиб кетишган деб ўйлагандик, шунинг учун полицияга бормагандик», — деди Мамитов.
Мирбек Мияров партия рўйхатида биринчи рақам остида ўз номзодини қўйганди. Қирғизистон Марказий сайлов комиссиясининг дастлабки маълумотларига кўра, «Ордо» партияси бор-йўғи 0,45 фоиз (қўлда санаш натижаларига кўра – 0,5 фоиз) овоз олган ва парламентга кирмаган.
2020 йил октябрь ойида Мияров президентнинг Чуй вилоятидаги ваколатли вакили этиб тайинланган эди, бироқ 2021 йилнинг март ойида у лавозимидан четлаштирилган ва унинг ўрнига Эркин Тентишев тайинланган. Вазирлар Маҳкамаси Мияров «бошқа ишга ўтгани муносабати билан» эгаллаб турган лавозимидан озод этилганини маълум қилган.
«КТРК» эфирида бўлиб ўтган сайловолди теледебатларида Миёров амалдаги ҳукуматнинг кадрлар сиёсатини танқид қилиб, аҳолининг ҳозир нафақат парламентга, балки бутун ҳукуматга ҳам ишончи йўқлигини айтган.
«Ҳар бир келган ҳукумат ўзича иш қилади. Ҳар куни ‘кнопкали’ депутатлар ёрдамида қанчадан қанча қонунлар қабул қилинмоқда, улар эса мамлакатимиз келажагини барбод қилмоқда. Биз буни тўхтатишимиз керак. Одамлар ҳатто сайловга ҳам бормайди, борадиганлар жуда оз. Аммо бундай бўлмаслиги керак, чунки амалдорлар ўз чўнтакларини қаппайтирмоқда», — деган Мияров.
24.kg нашрининг хабар беришича, 30 ноябрь куни тушдан кейин Мияров топилган. Унинг ўзи алоқага чиқиб, овоз беришдан кейин тоғга кетганини, ўша ерда машинаси бузилиб қолганини ва телефонининг заряди ўчганини айтган.
18 ноябрь куни Қирғизистонда парламент сайловлари бўлиб ўтди. Қирғизистон марказий сайлов комиссияси берган маълумотларга кўра, парламент сайловларида 50 фоиздан ортиқ бюллетенлар ўрганиб чиқилганидан кейин «Ота юрт Қирғизистон» партияси (айни вақтда мамлакатдаги ҳукмрон партия) етакчилик қилган.
Кейинроқ Қирғизистондаги бешта партия сайловлар натижасини тан олишдан бош тортгани хабар қилинган.
Изоҳ (0)