Марокаш терма жамоаси ва Франциянинг “Марсель” клуби собиқ ярим ҳимоячиси Абдулазиз Баррада 35 ёшида вафот этди, деб хабар бермоқда Марокаш қироллик футбол федерацияси матбуот хизмати Х ижтимоий тармоғида.
Баррада 24 октябрь, пайшанба куни вафот этди. Ўлим сабаблари ҳақида маълумот берилмаган. ОАВ хабарига кўра, собиқ футболчи юрак хуружига учраган.
“Марокаш Қироллик футбол федерацияси ўз номидан Марокаш терма жамоасининг собиқ футболчиси Абдулазиз Барраданинг оиласига самимий ҳамдардлик билдиради”, дейилади федерация баёнотида.
Барраданинг собиқ клуби “Марсель” ва у академиясида ўқиган Франциянинг “ПСЖ” жамоаси ҳам ҳамдардлик билдирди.
Баррада фаолияти давомида Испаниянинг “Хетафе”, Туркиянинг “Анталяспор”, БААнинг “Ал-Жазира” ва “Ан-Насср” клубларида ҳам тўп сурган. У Марокаш терма жамоаси сафида 28 та ўйин ўтказиб, 4 та гол урган. Баррада 2021 йилда фаолиятини тугатган эди.
Изоҳ (0)