Президент фармони билан Агросаноат мажмуи устидан назорат қилиш инспекцияси Қишлоқ хўжалиги вазирлигидан яна ҳукумат бўйсинувига ўтказилди.
22 октябрда қабул қилинган “Агросаноат мажмуида давлат назорати тизимини янада такомиллаштиришнинг қўшимча чора-тадбирлари тўғрисида”ги фармонга кўра Ўзагроинспекцияга бир қатор қўшимча вазифалар юкланди.
Булар:
- буғдойни қабул қилиш, сақлаш ва харидорларга юклаб жўнатиш жараёнида юзага келадиган табиий камайиш миқдорини ҳисобдан чиқаришни назорат қилиш;
- буғдой етиштирувчилардан харид қилинадиган буғдойни қабул қилиш ва сотиш жараёнларида стандарт талабларига кўра сифат кўрсаткичлари бўйича (мувофиқлик сертификати) ҳамда буғдой синфлари (сифат сертификати) бўйича сертификатлашни назорат қилиш;
- импорт қилинаётган қишлоқ хўжалиги экинларининг уруғлик ва кўчат материалларида гени модификацияланган организмларнинг (GMO) мавжудлигини аниқлаш;
- барча корхоналар, муассасалар ҳамда ташкилотларда қишлоқ хўжалиги, мелиорация ва йўл-қурилиш техникаларининг техник ҳолати, уларнинг эксплуатация қилиниши самарадорлиги, шунингдек, сервис ва таъмирлаш хизматларининг сифати, қишлоқ хўжалиги техникаси ва технологияларини мажбурий ва даврий синовдан ўтказиш устидан назоратни амалга ошириш.
Инспекция, шунингдек, соҳада давлат назоратини амалга ошириш ва ҳисоботларни юритиш жараёнларини тўлиқ рақамлаштириши лозим.
Маъмурий ислоҳотлар доирасида Агросаноат мажмуи устидан назорат қилиш инспекцияси 2023 йил декабридан Вазирлар Маҳкамаси тизимидан Қишлоқ хўжалиги вазирлиги ташкилий тузилмасига ўтказилиб ва унинг ваколатларига ўзгартиришлар киритилганди.
Изоҳ (0)