Ўзбекистон президенти Шавкат Мирзиёев 1-октябр куни Доҳа шаҳрида ўзига ажратилган қароргоҳда Power International Holding компанияси бошқаруви раиси Мутаз ал-Ҳайятни қабул қилди. Бу ҳақда Президент матбуот хизмати хабар берди.
Power International — дунёнинг 19 та мамлакатида энергетика, нефть-кимё, саноат, қишлоқ хўжалиги, транспорт инфратузилмаси, соғлиқни сақлаш, туризм каби соҳаларда фаол иш олиб бораётган Қатарнинг энг йирик миллий холдинги. Яқин Шарқдаги етакчи кўп тармоқли компаниялардан биридир.
Бу компания билан ҳамкорликда Жиззах вилоятида минтақанинг энг катта агросаноат мажмуаси бўладиган замонавий чорвачилик кластери қурилмоқда. Учрашувда истиқболли лойиҳалар сифатида қуйидагилар кўриб чиқилди:
- Ўзбекистонда юқори тезликда ҳаракатланишга мўлжалланган автомобиль магистралини барпо этиш;
- аммиак ва карбамид ишлаб чиқариш ҳажмини ошириш;
- ишбилармонлик ва меҳмонхона инфратузилмаси, соғлиқни сақлаш объектларини ташкил этиш.
Қатар томони тез орада холдинг Ўзбекистонда ўз офисини очишини маълум қилди.
Шавкат Мирзиёев Доҳада
Ўзбекистон президенти Шавкат Мирзиёев Қатар давлати амири шайх Тамим ибн Ҳамад Ол Сонийнинг таклифига биноан 1-октябр куни давлат ташрифи билан Доҳага ташриф буюрди. Давлат ташрифи дастурига мувофиқ, 2-октябр куни олий даражадаги учрашувлар бўлиб ўтади.
Етакчилар Ўзбекистон-Қатар муносабатларини янада мустаҳкамлаш ҳамда кўп қиррали ҳамкорликни, энг аввало, сиёсий, савдо-иқтисодий, инвестициявий ва маданий-гуманитар соҳаларда ривожлантириш масалаларини муҳокама қилади.
Изоҳ (0)