Ўзбекистон ва Тожикистон товар айирбошлаш ҳажми 1 миллиард долларга етказилиши маълум қилинди.
Хабар берилишича, Душанбе шаҳрида 12 март куни Ўзбекистон Республикаси ва Тожикистон Республикаси ўртасида савдо-иқтисодий ҳамкорлик бўйича Ҳукуматлараро комиссиянинг навбатдаги йиғилиши бўлиб ўтди. Унда Сўнгги йилларда ўзаро товар айирбошлаш ошиб бораётгани айтилди. Ўтган йили унинг ҳажми 757 миллион долларга етди. Келгусида ўзаро савдони 1 миллиард долларга етказиш учун биргаликда барча чораларни кўриш лозимлиги, бунга саноат кооперацияси, энергетика, қишлоқ ва сув хўжалиги, транспорт-логистика соҳаларида қатор қўшма лойиҳаларни изчил амалга ошириш орқали эришиш мумкинлиги қайд этилди.
Йиғилишда Ўзбекистон-Тожикистон халқаро чегара савдо зонасини яратиш лойиҳасини амалга оширишни жадаллаштириш, қишлоқ хўжалиги маҳсулотларини учинчи мамлакатларга экспорт қилиш учун чегара ҳудудларида улгуржи тарқатиш марказларини яратиш масалаларига ҳам эътибор қаратилди.
Шунингдек, агросаноат, тўқимачилик, фармасевтика, кимё, металлургия, электротехника, машинасозлик, қурилиш материаллари ишлаб чиқариш ва бошқа соҳаларда саноат кооперациясини чуқурлаштириш юзасидан мавжуд имкониятларни ишга солиш лозимлиги белгиланди.
Мажлисда ҳудудлараро ҳамкорликни ривожлантириш борасида амалга оширилаётган ишлар ўз самарасини бераётгани, айни пайтда Олий даражадаги учрашув арафасида Ўзбекистон-Тожикистон иккинчи ҳудудлараро форумини ўтказишга тайёргарлик кўрилаётгани маълум қилинди.
Томонлар қишлоқ хўжалиги соҳасида ҳам ҳамкорликни янада ривожлантириш, икки мамлакат чегарадош ҳудудларида қўшма қишлоқ хўжалиги кластерларини ташкил этиш ва ҳамкорликда тадқиқотлар ўтказишдан манфаатдорлигини билдирди. Транспорт-коммуникация соҳаси қўшма савдо-иқтисодий ва инвестисия лойиҳаларини амалга оширишда, дўст халқларимиз ўртасидаги биродарлик ва яхши қўшничилик муносабатларини мустаҳкамлашда эса маданий-гуманитар соҳадаги ҳамкорлик муҳим омил бўлиши қайд этилди.
Тадбир сўнггида Ўзбекистон ва Тожикистон ўртасида савдо-иқтисодий ҳамкорлик бўйича Ҳукуматлараро комиссиянинг 11-йиғилиши баёни имзоланди.
Изоҳ (0)