Twitter фойдаланувчи томонидан яратилган контентни монетизация қилиш дастурини жорий қилмоқда. Бу ҳақда ижтимоий тармоқ эгаси Илон Маск хабар берди.
Энди сиз обуначилар учун ҳар қандай материални пуллик қилишингиз мумкин — узун матнлардан тортиб видеоларгача, бунинг учун тегишли созламаларни танлашингиз керак, — деб ёзади тадбиркор.
Тадбиркорнинг сўзларига кўра, Twitter бу учун ҳеч қандай маблағ олмайди. Дастурнинг дастлабки 12 ойи давомида фойдаланувчилар ишлаб топган маблағдан фақат тўлов тизимлари комиссияси ундирилади.
Маскнинг қўшимча қилишича, ижтимоий тармоқ муаллифлик ҳуқуқи билан ҳимояланган контентни тарғиб қилади.
Шунингдек, Twitter Blue’га пулли обуна бўлган фойдаланувчилар энди 10 минг белгигача бўлган постларни чоп этиши ва ҳарфларни ифода этишда курсивдан фойдаланиши мумкин бўлади.
Аввалроқ эндиликда Twitter тавсияларида фақат пулли обуначиларнинг хабарлари чиқиши ҳақида хабар берилганди.
15 апрелдан бошлаб Twitter’даги “Сиз учун” тавсия ёрлиғи фақат Twitter Blue’га фаол обуна бўлган фойдаланувчиларнинг постларини кўрсатади.
Тадбиркор, шунингдек, чекловлар сўровномаларда қатнашиш учун ҳам қўлланилишини айтди — уларда фақат пулли обунаси бўлган фойдаланувчилар овоз бериши мумкин.
Бу сунъий интеллектга асосланган ботлар тўдаси билан курашишнинг ягона йўли. Акс ҳолда бу умидсиз ютқазилган жанг, — деб ёзди Маск Twitter’да.
Twitter Blue — бу фойдаланувчиларга Twitter’ни ўз эҳтиёжларига мос равишда созлаш, премиум функциялардан фойдаланиш имконини берувчи ойлик пулли обуна.
Изоҳ (0)