Twitter шанба, 25 февраль оқшомида камида 200 ходимини ишдан бўшатди. Бу ҳақда The New York Times манбаларига таяниб хабар берди.
Маълумотларга кўра, компания ходимлари сони 2 мингга яқин. Ишдан бўшатишнинг сўнгги тўлқини натижасида у яна 10 фоизга қисқарган.
Қисқартириш машинани ўрганиш ва сайт ишончлилиги устида ишлаган маҳсулот менежерлари, маълумотлар бўйича таҳлилчилар ва муҳандисларга таъсир қилди.
Шунингдек, ижтимоий тармоққа пул келтирувчи хизматларни бошқарадиган монетизация гуруҳидаги аксарият ходимлар ҳам ишдан айрилди.
“Ушбу тузилмада ишдан бўшатишнинг сўнгги тўлқинигача 30 киши ишлаган бўлса, ҳозир улар саккиз нафардан кам қолди”, — дейилади хабарда.
Баъзи ходимлар ишдан бўшатилгани ҳақида компания Slack корпоратив мессенжери орқали мулоқот қилишни қийинлаштирганидан кейин билиб олди. Шунингдек, улар электрон почта ва иш компьютерларига кириш ҳуқуқини йўқотган.
Маскнинг раҳбарлиги остида Twitter оммавий ишдан бўшатиш орқали ходимлар сонини қисқартирди. Айрим ходимлар эса сиёсатдаги катта ўзгаришлардан кейин кетишга мажбур бўлди.
Жорий йилнинг 19 январь куни хабар берилишича, Илон Маск инкор этаётганига қарамай, Twitter’да ходимларни ишдан бўшатиш жараёни кучайиб бормоқда.
Қайд этилишича, реклама ва монетизацияга масъул бўлган ўнлаб ходимлар компанияни тарк этишга мажбур бўлган.
Илон Маск Twitter’ни сотиб олиш бўйича келишувни 27 октябрь куни якунлаб, компания учун 44 миллиард доллар тўлаган.
Шундан сўнг тадбиркор ижтимоий тармоқ ходимларининг ярмига яқинини ишдан бўшатди, қолганларни эса юқори интенсивлик билан ишлаш кераклиги ҳақида огоҳлантирди.
ОАВ хабарларига кўра, ушбу воқеалар фонида платформа фаолиятини сақлаб қолиш учун муҳим бўлган кўплаб ходимлар Twitter’ни тарк этган.
Изоҳ (0)