“Давлат жиловининг бир ипи қўлимда, деб хоҳлаган ишни қилиш керак эмас” — Даврон Кабулов “Райгаз” билан судлашгани ҳақида (видео)

“Миллион” жамоаси сардори Даврон Кабулов YouTube’даги “Дарё” Lifestyle каналига берган интервьюсида меҳмонхона бизнеси бўйича судлашгани, қайси соҳадан кўпроқ даромад олиши ва афсонавий “Ситора” гуруҳининг яккахон концерт дастури ҳақида гапирди.

— Ўтган йили август ойида шахсий меҳмонхонамиз ишга тушди. Икки ярим ой ишлагандан кейин Яккасарой газ таъминоти прокуратура ҳузуридаги иқтисодий жиноятларга қарши курашиш департаменти билан бирга келиб, меҳмонхонани нишонга олишди. Икки йиллик давр учун 387 миллион сўм жарима қўллашди. Ундан кейин ҳам олти ойга яқин вақт ўтди, аммо ҳали меҳмонхона бунча даромад топгани йўқ. Менимча, улар тадбиркорларни шу тарзда “қўллаб-қувватлашяпти”.

Дадам меҳмонхонага газ таъминоти улангандан кейин АҚШга кетдилар. Аммо у пайтда ҳали меҳмонхона ишга тушмаган эди. Яъни АҚШга кетмасдан аввал сертификат олиш, GOST стандартидан ўтказиш каби ишларни амалга ошириб, меҳмонхона ишга тушгандан кейин туман газ таъминоти билан шартнома тузиб, газни улаш керак бўлган. Аммо у жараёнда дадам Тошкентда бўлмаганлар. Унгача бўлган даврда меҳмонхона ишламаганини ҳамма билади. Газ таъминоти эса уларга ариза топширган вақтимиздан то бугунги кунгача бўлган даврда қувурдан қанча газ ўтиши мумкин бўлса, ўшанча маблағни ҳисоблаб беришди. Бу худди қишда ҳам ёзда ҳам кунига 24 соат тинимсиз газдан фойдаланилган, дегандек гап. Хуллас, “Дарё”га берган интервьюда бу ҳақда айтганимдан кейин “Райгаз”дагилар мендан ранжишибди.

Қизиғи, улар отамга бир йил хорижга чиқиши учун тақиқ қўйиши ва шунча миллион жарима солишганига индамай кетишим керак экан. Агар мен уларнинг отасига бир оғиз ёмон гап гапириб кўрай, қанақа аҳволга тушишаркан. Давлат жиловининг бир ипи қўлимда экан, деб хоҳлаган ишини қилиш керак эмас, дейди Даврон Кабулов.

Суҳбат давомида у бир вақтнинг ўзида бир нечта фаолият тури билан шуғулланиши ва қайси биридан кўпроқ даромад олиши ҳақида гапирди.

— Ҳеч бир иш билан фақат даромад олиш учун шуғулланмайман. Агар мақсадим фақат пул топиш бўлса, пулни банкка қўйиб қўйишим ҳам мумкин. Албатта, ҳеч қачон бундан қилмайман. Агар шуғулланаётган иши инсонга завқ бермаса, бир кун келиб ундан зерикади. Меҳмонхона бизнеси, тўй хизматлари, ташкилотчилик, видео платформа, ишлаб чиқариш — ҳаммасидан завқ оламан.

Ўзбекистондаги энг яхши ва қиммат бошловчи бўлиш учун умримнинг бир қисмини сарфладим. Ҳозир-ку, у даромадимнинг асосий манбайи эмас. Аммо “Тўй қилсам, Даврон Кабуловни айтаман”, деб ният қилган инсонлар бор. Уларнинг хоҳишини “ўлдириш”ни истамайман. Шу боис вақтимни тақсимлаш ва ҳамма ишга улгуришга ҳаракат қиламан, дейди Даврон Кабулов.

Декабрь ойида афсонавий “Ситора” гуруҳининг яккахон концерт дастури бўлиб ўтади. Унда АҚШда яшаётган Феруза Латипова ҳам иштирок этади. Даврон Кабулов нега гуруҳнинг яккахон концерт дастурига продюсерлик қилаётгани ҳақида гапирди.

— Бир йили “Миллион”нинг концертига “Ситора” гуруҳини таклиф этдик. Уларнинг мухлислари кўлами қай даражада эканлигини яхши биламан. Ўттиз ёшдан ошган инсонлар орасида гуруҳнинг мухлислари ниҳоятда кўп. Улар ёшлик дамларини эслаш учун ҳам концертга ташриф буюришади, деб ўйлайман. Мен концертдан даромад олиш ҳақида ўйлаётганим йўқ, ўзим шу ишдан завқланяпман. Шу боис уч кунлик концертларини ўтказишга қарор қилдим, дейди Даврон Кабулов.

Видеони қуйида тўлиқ ҳолда томоша қилинг.