“Миллион” жамоаси аъзоси ва Instagram тармоғида 2,2 млн обуначига эга бўлган Мўмин Иброҳимов “Дарё”га берган интервьюсида вайнларга кўп маблағ сарфлаши ва улар ўзини қанчалик оқлаши ҳақида гапирди.
— Ҳақиқатан ҳам вайнларга маблағ аямайман. Вайнлар профессионал техникаларда олинади, графика мутахассисларининг хизматидан ҳам фойдаланамиз. Графика иши эса арзон турмаслигини кўпчилик яхши билади.
Киноларни яхши кўрганим учун вайн эмас, киноконтент йўналишини танлаганман. Кинога қанча маблағ сарфласангиз, кадрлар шунча яхши чиққанидек, киноконтент ҳам худди шундай. Энг қимматга тушган киноконтент футбол ҳақидагиси бўлди. Митти.ме жамоаси билан олинган ролик учун 11 минг АҚШ доллари сарфланган. Чунки унинг графикасини Голливудда қилдирганмиз. “Қудалар жанги” номли ролигимиз ҳам муваффақиятли чиққан. Уни хорижликлар ўз тилларига таржима қилиб, намойиш этганларидан ҳам хабаримиз бор. Унинг графикасига 1300 АҚШ доллари сарфлаганмиз.
“Шунча маблағ сарфлабсиз, бу ўзини қанчалик оқлайди?” деб кўп сўрашади. Гап кетган маблағнинг қайтиб келишида эмас, Ўзбекистонда ҳам сифат борлигини дунё кўришини истайман. Ҳозир ижтимоий тармоқларда кузатувчи йиғиш у қадар қийин эмас.
Киноконтент йўналишида реклама суратга олиб беришни сўраётганлар ҳам кўп. Аммо кўпчилик сарфланадиган маблағни эшитиб рози бўлмайди. Масалан, Даврон Кабулов “Миллион”нинг янги концерт рекламасини шу йўналишда суратга олиб беришимни сўради. Харажатларнинг ўзи 7 минг АҚШ доллари бўлди. Қиммат, аммо самарали натижа берди.
Оддий вайн олишни истамайман. Ҳаммаси учун алоҳида тайёргарлик кўрилади, керак бўлса Янгиобод бозорига бориб, реквизитлар ҳам сотиб оламиз. Масалан, фалокат йигит ҳақидаги киноконтентда графикадан умуман фойдаланмаганмиз. Аммо анча вақт эски буюмлар сотиладиган бозорга бориб, керакли реквизитларни тўплаганман, — дейди Мўмин Иброҳимов.
Мўмин Иброҳимов суҳбат давомида сериалда арзимас ҳақ эвазига суратга тушгани ва уни эфирда кўриб афсуслангани ҳақида гапирди.
— “Истанбуллик келин” аслида кино эмас, сериал бўлган. Хуллас, продюсер ўз чўнтагини ўйлаб, сериаллар қисмини оширишга ҳаракат қилган. Уни эфирда кўриб, зерикиб кетганман. Шунинг учун ҳам бундан кейин бирорта сериалда суратга тушишга рози бўлганим йўқ. Кейин сериални яна қайта монтаж қилиб, 5 қисмли кино сифатида ҳам эфирга беришди. Маъно бир-бирига тўғри келмайди, бу лойиҳа фақат пул топиш учун олинганини англадим. 80 қисмли сериал учун уч ой вақтимни сарфладим. Адашмасам шунча меҳнат учун 2 минг АҚШ доллари олганман холос. Шунча меҳнат зое кетганига афсусланаман. Ҳамма нарсада ҳикмат бор деганларидек, бу лойиҳа сабаб Асқар Ҳикматов билан яқиндан танишганман, — дейди Мўмин Иброҳимов.
Изоҳ (0)