“Халқлар дўстлиги” санъат саройида янги концерт дастурини тақдим этаётган “Миллион” жамоаси сардори Даврон Кабулов “Дарё” мухбирининг эски таркибни тўплаш ҳақидаги саволига қуйидагича жавоб берди.
— Сизга бир сирни очаман. Ўтган йили “Миллион”нинг 10 йиллик юбилей концерт дастуридан олдин кўпчиликка алоқага чиқиб, “Келинглар гина-кудуратни унутиб, жамоанинг биринчи юбилей концертида бирга саҳнага чиқайлик. Унинг оёққа туришида сизларнинг ҳам ҳиссангиз бор, бевосита сизнинг танилишингизда “Миллион”нинг ўрни катта”, дедик. Менимча, битта концерт учун йиғилсак, аъло иш бўларди. Аммо йиғилмадик, менимча бундан бу ёғига ҳам бирга концерт беришимиз керак эмас.
Боиси ҳафсала пир бўлганидан кейин менда эскидан кўра, янги жамоани оёққа қўйиш хоҳиши кучайди. Бундан ташқари, эски жамоа йиғилганида ҳам одамларга эски завқни беради, деб билмайман. Тан олиш керак, ёш улғайди, кимдир семирган, аввалгидек саҳнада ҳаракатланолмаслиги мумкин. Улар аввалгидек саҳнада елиб-югуриб рол ўйнайдиган ёшдан ўтди. Ҳаёт тўхтаб қолмайди, агар янгилик қилинмаганида одамзод ҳали ҳам от аравада юрган бўларди.
Янги таркибдаги йигитлардан кўнглим тўқ, улар халқ олқишини олишяпти. Умид қиламанки, улар баъзи акаларининг йўл қўйган хатоларини такрорлашмайди. Шу пайтгача “Миллион”да чиққан бирорта инсонга ёмонликни раво кўрмадик. Улар жамоага қўшилгунга қадар қандай даражада эдию, ундан кетаётганда нималарга эришгани ҳақида ўйлаб кўришса яхши бўларди. Аммо интервьюларда ҳар қандай гапни гапириб, дилни хира қилишади.
Биз истеъдодини пайқаб унга ёрдам бердик, жамоа билан дунё кезиб, яхшигина гонорар олишди. Афсуски, иккита роли машҳурликка эришгандан сўнг ҳар қандай гапни гапириш — кўрнамакликдан бошқа нарса эмас. Бу нарса Яратганга ҳам ёқмайди, — дейди Даврон Кабулов.
Изоҳ (0)