Ўзбекистонда “Стартап лойиҳалар ва венчур молиялаштириш экотизимини янада ривожлантириш чора-тадбирлари тўғрисида”ги президент қарори қабул қилинди.
Қарорга кўра, рақамли технологиялар соҳасидаги стартап лойиҳаларни ҳар томонлама қўллаб-қувватлашга қаратилган Рақамли стартаплар дастури амалга оширилади.
Дастурда қуйидаги резидент юридик шахслар иштирок этиши мумкин:
- Қуйидаги талабларга мос келувчи стартап лойиҳалар:
- фаолият давомийлиги – 6 ойдан 7 йилгача бўлган;
- календарь йилида жами даромади – 10 миллиард сўмдан ошмаган;
- инкубация ёки акселерация дастурини муваффақиятли якунлаганлигини тасдиқловчи ҳужжатга эга бўлган;
- рақамли технологияларга асосланган, юқори ўсиш ва хорижий бозорларга чиқиш салоҳияти бўлган бизнес моделга эга бўлган;
- стартап лойиҳалар экотизими платформасида рўйхатдан ўтган.
- Стартап экотизим иштирокчилари – венчур жамғармалар ва хусусий инвесторлар ҳамда стартап лойиҳалар учун акселерация ва инкубация дастурларини ташкиллаштириш хизматларини кўрсатувчи тадбиркорлар.
Қарорга кўра, дастур иштирокчиларига қуйидаги харажатлар қоплаб берилади:
- 5 йилдан ортиқ муддат давомида фаолият юритаётган ҳамда камида 100 миллион доллар миқдорида инвестиция жалб қилган етакчи халқаро акселерация дастурларида иштирок этиш;
- инкубация ва акселерация дастурларини амалга оширувчи тадбиркорларга менторлар ва тренерларни жалб қилиш билан боғлиқ харажатларнинг 50 фоизигача бўлган, бироқ 50 минг доллар эквивалентидан ошмаган миқдорда;
- патентлаш ҳамда интеллектуал фаолият натижалари ва савдо белгиларини рўйхатдан ўтказиш харажатлари;
Шунингдек, қиймати 50 миллион доллардан кўп бўлган хорижий венчур жамғармалардан инвестиция жалб қилган стартап лойиҳаларга мазкур инвестицияга тенг миқдоргача бўлган, бироқ 100 минг доллар эквивалентдан ошмаган миқдорда инвестиция маблағлари ажратилади.
Дастур иштирокчиларини қўллаб-қувватлаш учун венчур жамғарма томонидан гаров таъминотисиз, асосий ставкадан 4 фоизлик пункт юқори ставкада 300 миллион сўмгача стартап лойиҳаларга қарз маблағлари ажратилади. IT-Visa бериш амалиёти стартап лойиҳаларнинг таъсисчилари ва мутахассисларига ҳам татбиқ этилади.
Изоҳ (0)