Ўзбекистонлик стартапчилар Кремний водийсига юборилади — Инновацион ривожланиш вазирлиги
Ўзбекистонлик муваффақиятли стартап лойиҳа муаллифлари тажриба ўрганиш ва ҳамкорликни йўлга қўйиш мақсадида Кремний водийсига юборилади.
Бу ҳақда инновацион ривожланиш вазири ўринбосари Шаҳло Турдиқулова ва АҚШнинг StrategEast компанияси президенти Анатолий Моткиннинг учрашувида маълум бўлди.
Учрашувда ҳамкорликда стартап акселераторларини ташкил этиш, ахборот технологиялари (АТ) соҳасини ривожлантириш ва биргаликда лойиҳаларни йўлга қўйиш муҳокама қилинди.
Анатолий Моткин Ўзбекистонда муваффақиятли стартап лойиҳа муаллифларини Кремний водийсидаги АҚШ стартаплари тажрибасини ўрганиш ва ҳамкорликни йўлга қўйиш мақсадида Калифорнияга юборишни қўллаб-қувватлашини маълум қилди.
Шу билан бир қаторда, томонлар АҚШнинг Стенфорд университети билан ҳамкорликда амалга оширилаётган «Ишбилармон аёллар» дастурини Ўзбекистонга татбиқ этиш, шунингдек, Беларусда йўлга қўйилган лойиҳа тажрибаси асосида технологик стартаплар инкубаторини ташкил этиш бўйича ҳамкорлик қилишга келишиб олдилар.
Ушбу ишларнинг амалга оширилиши натижасида янги, сифатли ва юқори технологияларга асосланган иш ўринларининг яратилиши, янги стартап лойиҳаларининг пайдо бўлиши ҳамда молиявий сармоялар жалб қилиниши кутилмоқда.
«StrategEast» АҚШнинг Вашингтон шаҳрида жойлашган ташкилот бўлиб, асосий фаолияти халқаро молиявий институтлар, агентликлар ва АТ соҳасидаги йирик ишбилармон доира вакиллари билан ҳамкорликда Евросиё давлатларида рақамли иқтисодиётни ривожлантиришга қаратилгандир.
