Tesla бош директори ва Twitter эгаси Илон Маск сунъий интеллект бўйича ўзининг xAI стартапини ишга туширганини маълум қилди, деб хабар бермоқда Reuters.
“Реалликни тушуниш учун xAI яратилганини эълон қиламан”, — деб ёзди Маск Twitter’да.
Шундан сўнг, xAI лойиҳасининг Twitter саҳифасида шундай хабар қолдирди:
“Энг асосий саволлардан қайсилар жавобсиз қолган?”
Reuters маълумотларига кўра, xAI жамоаси таркибида собиқ DeepMind муҳандиси Игор Бабушкин, Google’нинг собиқ ходимлари Тони Ву ва Кристиан Сзегеди ҳамда аввал Microsoft’да ишлаган Грег Янг бор.
Апрель ойида Илон Маск сунъий интеллект TruthGPT’ни ишга тушириши ҳақида эълон қилганди, у Google ва Microsoft чиқарган сунъий интеллект билан рақобат қилиши кутилмоқда.
Март ойида Илон Маск Невада штатида Х.АI Corp. компаниясини рўйхатдан ўтказди.
Эслатиб ўтамиз, март ойида Илон Маск, Apple асосчиларидан бири Стив Возняк ва мингдан ортиқ экспертлар умумий хавфсизлик протоколлари жорий этилгунга қадар илғор сунъий интеллектни ривожлантиришни камида олти ойга тўхтатиб туришга чақирувчи очиқ хатни имзолаган эди. Мактуб муаллифларига кўра, бу технология инсониятга хавф туғдиради, чунки “кучли рақамли интеллект”ни ҳатто яратувчилари ҳам бошқара олмайди ва замонавий сунъий интеллект тизимлари одамлар билан рақобатлаша бошлайди.
Мактуб чоп этилишидан бир оз олдин Microsoft томонидан молиялаштирилган Америка IT-компанияси OpenAI ChatGPT асосини ташкил этувчи генератив сунъий интеллект тили моделининг янги версияси бўлган GPT-4 ни тақдим этган.
Изоҳ (0)